Semeıde Abaıdyń 175 jyldyǵyna arnalǵan kórme ashyldy

ÓSKEMEN. QazAqparat – Semeı qalasynda uly aqynnyń mereıtoıyna oraı mektep oqýshylarynyń qolóner buıymdarynyń kórmesi ashyldy, dep habarlaıdy QazAqparat.

Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq mýzeı-qoryǵynda qaladaǵy №16 mektep oqýshylarynyń qolóner buıymdarynyń kórmesi uıymdastyryldy. Kelýshiler nazaryna usynylǵan kartınalarǵa, kúrishten, kıiz ben boıaýlardan jasalǵan ekspozıtsııalarǵa aqynnyń ómiri men shyǵarmashylyǵy arqaý bolǵan. Bul kórmege oqýshylar bir jyl boıy daıyndalypty.

Bir buıymǵa kólemi men taqyryptyń kúrdeliligine qaraı on kúnnen jarty jylǵa deıin ýaqyt jumsalǵan. Úshinshi synyp oqýshylarynyń qolynan shyqqan «Abaı men Shákárim Jıdebaıda» atty eksponatqa 10 kún ýaqyt ketipti. Buıymnyń sátti shyǵýyna ustazdar men ata-analar da óz úlesterin qosqan.

«Oqýshylarymyz ár kórmege únemi tyńǵylyqty daıyndalady. Búgingi kórmege qoıylǵan buıymdar ár synyp oqýshylarynyń qolynan shyqqan. Bul balalar úshin úlken tájirıbe boldy. Buıymdy olar zeıin qoıyp, zor qyzyǵýshylyqpen jasady», - deıdi mekteptegi tehnologııa pániniń muǵalimi Imanbek Hamzın.