Semeıde Abaı atyndaǵy jańa meshit ashyldy
Meshittiń qurylysyn 2008 jyly sheteldik ınvestorlar bastaǵan bolatyn. Alaıda qarjylyq qıyndyqtarǵa baılanysty olar jobany jalǵastyrýdan bas tartty.
Sol kezdegi jobanyń quny tórt mıllıon dollardy quraǵan. 2010 jyly 100 mıllıon teńge bólgen «Qazaqmys» korporatsııasy meshit qurylysyn jalǵastyrýdy uıǵardy.
Biraq korporatsııa da bul isti sońyna jetkize almaǵan.
Segiz jyl boıy semeılikter meshit qurylysyna beı-jaı qaramaı, jumystyń jandanýyna tilekshi boldy.
Meshit jobasy osy ýaqytqa deıin birneshe ret ózgergen.
2018 jyly qurylysty aıaqtaýǵa kásipker Dýlat Tastekeev kiristi. Óz qarajatymen jumysty qaıta jandandyrǵan kásipker bastalǵan isti sońyna deıin jetkizgen.
Nátıjesinde búgin qaladaǵy eń úlken dinı nysan boı kóterip, saltanatty túrde ashyldy.
«Jańa tórt munaraly meshitke uly aqyn Abaı aty berildi. Syıymdylyǵy - 2 500 adam. Altyn jalatylǵan munaralardyń bıiktigi 37 metrdi quraıdy. Túrkistan ákimdigi Abaıdyń 175 jyldyǵyna arnalǵan is-sharalar aıasynda onyń aýmaǵyn abattandyrǵan. Olar bul jobaǵa 600 mıllıon teńge bóldi. Meshit ǵımaratyna irgeles 47 myń sharshy metr abattandyrylyp, eki jerústi kópir salynyp jatyr. Sondaı-aq 500 avtokólikke arnalǵan turaq qarastyrylyp, 200 sham ornatylǵan», - dep habarlady Semeı qalalyq aqparat ortalyǵy.
Ashylý saltanatyna QR Bas múftıi Naýryzbaı qajy Taǵanuly, din ókilderi men qala basshylyǵy qatysty.
Qala ákimi Nurymbet Saqtaǵanov qurylysqa atsalysqan barlyq janǵa alǵys aıtyp, semeılikterdi kópten kútken meshittiń ashylýymen quttyqtady.
Shahar turǵyndaryn quttyqtaýǵa ataqty aqyn Muhtar Shahanov pen teatr jáne kıno rejısseri Asanáli Áshimov te keldi.
«Búgingi shara Naýryz meıramymen tuspa-tus kelip otyr. Semeılikter úshin bul úlken qýanysh. Meshit qurylysy uzaqqa sozylyp, biraz ýaqytqa toqtatyldy. Dýlat Tastekeevtiń arqasynda qurylys qaıta jandanyp, búgin onyń ashylýyn atap ótýdemiz. Barshańyzdy Ulystyń uly kúnimen quttyqtaımyn», - dedi QR Bas múftıi Naýryzbaı qajy Taǵanuly.
Dýlat Tastekeevtiń aıtýynsha, qurylysty ótken jyldyń tamyz aıynda Abaıdyń 175 jyldyǵyna oraı aıaqtaý josparlanǵan edi.
Biraq koronavırýs pandemııasyna baılanysty jumys kesheýildegen.
«Meshit qurylysy eki jarym jyl júrgizildi. Biz qurylysty alǵash bastaǵan kezde ony eki jyl ishinde aıaqtap, 2020 jyldyń tamyzynda, hakim mereıtoıyna oraı ashýdy josparladyq. Alaıda, álemdik pandemııa jumysqa áser etpeı qoımady. Sondyqtan qurylys taǵy jarty jylǵa sozyldy. Soǵan qaramastan, biz bastalǵan isti sońyna deıin jetkize aldyq. Kún men tún teńelgen qasıetti kúni sizdermen birlesip meshitti saltanatty túrde ashyp jatyrmyz. Bul men úshin jáne búkil Semeı úshin úlken qýanysh. Óıtkeni semeılikter bul meshittiń ashylýyn on jyldan astam ýaqyt kútti. Osy jyldar ishinde talaı merdiger ózgerdi. Al bizdi meshittiń taǵdyry alańdatpaı qoımady. Semeıdiń damýyna óz úlesimizdi qosqanymyzǵa óte qýanyshtymyz», - deıdi Dýlat Tastekeev.