Semeıde 7-synyp oqýshysy Ertiske batyp bara jatqan dosyn qutqaryp qaldy

SEMEI. QazAqparat - Semeıde 11 jasar bala Ertis ózenine batyp kete jazdady, dep habarlaıdy QazAqparat.

1 mamyr kúni Áýezov aýdandyq polıtsııa bólimine qala turǵyny habarlasyp, Shaǵala aýdany mańynda kóz aldynda kishkentaı balanyń sýǵa ketkenin habarlaǵan.

Oqıǵa ornyna birinshi bolyp jetken patrýl polıtsııasy batalony Ertis ózenine batyp kete jazdaǵan 11 jasar oqýshyny dereý jedel járdem dárigerlerine tapsyrdy.

Keıin anyqtalǵandaı, balany onyń synyptasy, №11 orta mekteptiń 7-synyp oqýshysy Rýslan Nurǵalıuly Omarov qutqaryp qalǵan.

Ol dosyna alǵashqy medıtsınalyq kómek kórsetken.

«Júzý bilmeseńiz jáne negizgi qaýipsizdik erejelerinen beıhabar bolsańyz, sýǵa túspegenińiz abzal. Ata-analar kámeletke tolmaǵan balasyn kózden tasa etpegeni durys» dep eskertedi polıtsııa.