Semeıde 64 ret jol erejesin buzǵan júrgizýshi anyqtaldy
Abaı oblystyq polıtsııa departamenti baspasóz qyzmetiniń málimetine súıensek, tártip saqshylary Semeıde jol qozǵalysy erejesin talaı ret buzyp, aıyppul tólemeı júrgen júrgizýshilerdi anyqtady.
Jol erejesin 64 ret buzyp, 1 673 250 teńge somasyna aıyppul arqalaǵan «Folsvagen» markaly kóligi, 30 ret jol erejesin buzǵany úshin 724 500 somasyna aıyppul salynǵan «BMV» jáne 2 035 500 teńge somasynda 24 buzýshylyq jasaǵan «Toıota» markaly avtokólikteriniń júrgizýshileri toqtatylǵan. Qazirgi ýaqytta atalǵan kólikterdiń barlyǵy arnaıy aıyppul turaǵyna qoıyldy.
«Júrgizýshilerge QR ÁQBtK-niń 893 babyna sáıkes, ákimshilik jaýapkershilikke tartylǵan adam aıyppul tóleý qajettigi týraly nusqama zańdy kúshine engen kúnnen bastap aıyppul somasyn otyz táýlikten keshiktirmeı tóleýge tıis ekenin eske salamyz. Qaýlyny erikti túrde oryndamaǵan jaǵdaıda aıyppul Kodekstiń 894 babyna sáıkes májbúrli túrde óndirilip alynady. Azamattar 7 táýlik ishinde ákimshilik aıyppuldy 50 paıyz mólsherinde tóleýge quqyly», - delingen aqparatta.