Semeıde 45 kópbalaly otbasy baspanaly boldy

SEMEI. QazAqparat - Shyǵys Qazaqstan oblysynyń ákimi Danıal Ahmetov Semeıdegi Qaraǵaıly shaǵyn aýdanynda bolyp, qyryq bes kópbalaly otbasyǵa páter kiltterin tabys etti, dep habarlaıdy QazAqparat.

Kópbalaly otbasylardy baspanamen qamtý maqsatynda oblystyq turǵyn úı qurylysy baǵdarlamasy aıasynda Qaraǵaılyq shaǵyn aýdanynda salynǵan úıden 50 páter satyp alyndy. Aımaq basshysy páterlerdi aralap, turǵyn úılerdiń sapasyna rızashylyǵyn bildirdi, turǵyndardy jańa qonystarymen quttyqtady.

«Barlyq kópbalaly analarǵa páter berý kerek. Biraq bul úlken másele bir jyldyń ishinde sheshilmeıdi. Osy jyly Semeıde jyl sońyna deıin taǵy 30 otbasyǵa páter beriledi degen jospar bar. Osy jyldyń ekinshi jarty jyldyǵynda qalada taǵy 179 myń sharshy metrge úı salamyz. Bul óz kezeginde máseleni sheshýge múmkindik beredi»,-dedi D. Ahmetov.

Búgingi kúni memlekettik turǵynúı qorynan baspana alý úshin 10,5 myńnan astam azamat kezekte tur. Onyń ishinde 371-i kóp balaly otbasy.

Bıylǵy jyly oblystyń 290 kópbalaly otbasyna baspana kiltin tabystaý kózdelýde.

Aıta ketý kerek, sońǵy úsh jylda oblysta turǵynúı qurylysy qarqyndy damýda. Ótken jyly ShQO-da 410,5 myń sharshy metr turǵynúı paıdalanýǵa berildi. Al aǵymdaǵy jyly 639,9 myń sharshy metr turǵyn úıdiń qurylysy bastaldy.