Semeıde 40-qa jýyq úıdiń qasbetine kúrdeli jóndeý júrgiziledi

SEMEI. QazAqparat – Semeıde úılerdiń qasbetterin jóndeý jumysy bastaldy, dep habarlaıdy QazAqparat tilshisi Semeı qalalyq ákimdiginiń baspasóz qyzmetine silteme jasap.

Bıyl Semeı qalasynda 40-qa jýyq úıdiń qasbetin kúrdeli jóndeýden ótkizý josparlanýda. Oǵan 4 merdiger uıym jumyldyrylady.

«Úılerdiń syrttaryn tek boıap qana qoımaı, kúrdeli jóndeýden ótkizý kerek. Qazirgi tańda úılerdiń sylaq qabyrǵalary qulap jatyr. Qasbetterdi jóndeý kezinde osyǵan mán bergen durys. Boıalǵan qabyrǵalardyń túsi uzaq jyldar boıy saqtalýy shart» dedi Semeı qalasynyń ákimi Nurbol Nursaǵatov merdiger uıymdardyń basshylaryna.

Semeı qalasy ákimdiginiń málimetinshe, bıyl shahardaǵy Abaı, Shákárim, Qanysh Sátbaev, Shoqan Ýálıhanov, Áset Naımanbaev, Máńgilik el, Uranhaev, Baýyrjan Momyshuly, Qaıym Muhamedhanov, Ibraev kósheleri men №1 yqshamaýdandaǵy 32 turǵyn úıge jóndeý júrgiziledi.

Sonymen qatar shahardaǵy birneshe kópqabatty turǵyn úıdiń qabyrǵasyna Shákárim, Baýyrjan Momyshuly, Qanysh Sátbaev syndy tulǵalardyń mýraldary beınelenedi. Al №1 shaǵynaýdandaǵy birneshe úıdiń qabyrǵasyna óńirdiń kórikti jerleriniń sýretteri salynady.

Aıta keteıik, ótken jyly Semeıdegi Shákárim dańǵylyndaǵy 19 turǵyn úıge abattandyrý jumysy júrgizilgen bolatyn.