Semeıde 32 kóppáterli úıdiń qasbeti jóndeledi

ASTANA. QazAqparat – Semeıde 32 kóppáterli úıdiń qasbeti jóndeledi. Bul týraly Semeı qalasynyń ákimi Nurbol Nursaǵatov qala turǵyndarymen ótken kezdesýinde málimdedi, dep habarlaıdy QazAqparat tilshisi.

«Bıyl qala ákimdigi qalanyń syrtqy kelbetine erekshe kóńil bóledi. 2023 jyly qalanyń syrtqy kelbetin jaqsartý úshin turǵyn úı sharýashylyǵyn damytý jónindegi jumystar sheńberinde 32 kópqabatty turǵyn úıdiń qasbetterine aǵymdaǵy jóndeý jumystary júrgiziletin bolady», - dedi Nurbol Nursaǵatov.

Sondaı-aq, bıyl birneshe kópqabatty turǵyn úılerdiń qabyrǵalaryna mýraldar beınelenbek.

«Turǵyn úılerdiń syrtyna Semeı qalasynyń týrıstik kelbetin beıneleıtin jáne qalaǵa erekshe kórik beretin mýraldardy salýdy josparlap otyrmyz. Mysaly, Sh.Qudaıberdiuly, B.Momyshuly, Q.Sátbaev kóshelerindegi úılerge sol uly tulǵalardyń beıneleri bar mýraldar salynady. Sonymen qatar, №1 shaǵyn aýdandaǵy birneshe úıdiń qabyrǵalaryna Abaı oblysynyń kórikti jerleriniń sýretteri beınelenedi», -dedi qala ákimi.