Semeıde 30 jyl boıy jeke kýáliksiz júrgen adam anyqtaldy
ShQO polıtsııa departamenti baspasóz qyzmetiniń málimetine súıensek, tártip saqshylary jeke basty kýálandyratyn qujatsyz turatyn azamattardy anyqtaý úshin turaqty jumys júrgizýde. Osy jyldyń basynan beri osyndaı 200-den astam adam anyqtalǵan. Qazirgi ýaqytta olar Qazaqstan Respýblıkasynyń azamattary dep tanylyp, jeke kýálikterin rásimdedi.
«Máselen, Semeı qalasy PB Kóshi-qon qyzmeti bóliminiń ókilderi 1974 jylǵy úlgidegi KSRO pasportymen júrgen 54 jastaǵy er adamǵa jeke kýálik alýǵa kómektesti. Novosibir oblysynyń týmasy 1989 jyly Semeıge kóship kelgen. Osynda úılenip, eki balasy dúnıege kelgen ol áli kúnge deıin qyzyl pasportyn jeke kýálikke aıyrbastamaǵan. Sóıtip, er adam 30 jyldan astam ýaqyt boıy turaqty jumysqa ornalasa almady», - delingen aqparatta.
Kóshi-qon qyzmetiniń mamandary oǵan Reseı Federatsııasynan qajetti qujattardy suratýǵa kómek kórsetti. Qazirgi ýaqytta azamat kópten kútken qujatyn qolyna aldy. Endi resmı túrde jumysqa ornalasyp, barlyq memlekettik qyzmetterdi paıdalana alady.