Semeıde 24 myńǵa jýyq adam jer telimin alýǵa kezekte tur
Bul týraly Aımaqtyq kommýnıkatsııalar qyzmetinde ótken baspasóz máslıhatynda qalalyq Jer qatynastary bóliminiń basshysy Qudaıbergen Seıilhanov málimdedi.
«Oblys ákiminiń qaýlysyna sáıkes, Semeıde qalanyń bas josparyn bekitkenge deıin qurylysqa arnalǵan jer telimin berýdi toqtata turý týraly sheshim qabyldanǵan. Bekitilgen jospar boıynsha jer úı salý úshin jalpy kólemi 4070,3 gektar 10 turǵyn úı massıvi qarastyrylǵan. Jer ýchaskeleriniń sany – 13 715. Qazirgi ýaqytta Ushaqtar jáne Komsomol turǵyn úı massıvterine kommýnıkatsııalar tartyldy», - dedi ol.
Qudaıbergen Seıilhanovtyń aıtýynsha, byltyr «Semeı qurylys materıaldary» JShS-ǵa «Birqabatty Shyǵys» baǵdarlamasy boıynsha 10 jer ýchaskesi berilgen. Ol jerlerde jalpy alańy 1 142 sharshy metr on jeke úı salyndy.
«Qalǵan jer ýchaskeleri «Birqabatty Shyǵys» baǵdarlamasyn odan ary júzege asyrý úshin rezervke alyndy. Sonymen qatar bıyl kezekte turǵandarǵa 48 jer ýchaskesi berilgen. Búginde olardyń 31 ýchaskesi rásimdeldi», - dedi bólim basshysy.