Semeıde 23 adam ata-ana quqyǵynan aıyryldy

SEMEI. QazAqparat - Semeıde 3 kúnge sozylǵan «Turmys» jedel aldyn alý sharasy aıaqtaldy. Tártip saqshylary júrgizgen reıd kezinde otbasylarynyń mazasyn qashyrǵan 40 adam ákimshilik jaýapkershilikke tartyldy, dep habarlaıdy QazAqparat tilshisi.

Reıd barysynda polıtseıler turmystyq jaǵdaıy tómen jáne ishimdikke salynǵan otbasylardy aralady. Nátıjesinde 277 januıa tekserilip, 28 quqyqbuzýshylyq anyqtaldy.

Polıtsııa qyzmetkerleri sońǵy jyldary ishimdikke salynǵan erli-zaıyptylardyń kóbeıgenin atap ótýde. Tek 5 aıdyń ishinde olar 126 otbasyn tirkeýge alǵan. 23 adam ata-ana quqyǵynan aıyryldy. Olardyń sany artýy múmkin. Sebebi, maskúnemderdi qansha jaýapqa tartqanmen, nátıje bolmaı otyr. Sondyqtan quqyqqorǵaý organdarynyń ókilderi qatań shara qabyldaýǵa týra keletinin aıtady.

«Bul sharalar aldaǵy ýaqytta da jalǵasyn tabady. Birneshe otbasyǵa eskertý jasaldy. Eger sońǵy eskertýge qulaq aspasa, ul-qyzdary Balalar úıine jiberiledi. Sebebi, olar ózderi ishimdikke salynǵandyqtan, balalarynyń jaǵdaıyna bas aýyrtpaıdy. Al balalar tamaqsyz, ash-jalańash otyrýǵa májbúr», - deıdi Semeı qalalyq ІІB ınspektory Aıda  Beısembınova.