Semeıde 19 kópbalaly otbasy qonys toıyn toılady

SEMEI. QazAqparat – Qala kúni qarsańynda kópbalaly 19 otbasy qýanyshqa bólendi. Olarǵa Qaraǵaıly shaǵyn aýdanynyń páter kiltterin oblys ákimi Danıal Ahmetov tabys etti, dep habarlaıdy QazAqparat «Semeı aqparattyq ortalyǵyna» silteme jasap.

«Biz kópbalaly otbasylarǵa páter bólý baǵdarlamasyn iske asyrylyp kelemiz. Kópbalaly analar-elimizdiń baǵa jetpes baılyǵy. Sondyqtan búgin olarǵa jańa páterlerdiń kiltterin tabystaǵanyma dán rızamyn. Ár otbasy óz úıiniń jylýyn seziný qajet. Sizderge baqyt pen myqty densaýlyq tileımin» - dedi ShQO ákimi Danıal Ahmetov.

Páter kiltterine ıe bolǵan turǵyndar qýanyshtaryn bólisýge asyqty. Bes balanyń anasy Symbat Nurǵalıeva osy sátti 12 jyl kútken.

«Biz otbasymyzben 12 jyl boıy osy mańyzdy kúndi asyǵa kúttik. Búgin mine, páter kiltin alyp, tóbemiz kókke jeterdeı qýanyp turmyz. Otbasymnyń atynan barshańyzǵa alǵys aıtamyn», –dedi qýanysh ıesi S.Nurǵalıeva.

Kezdesýdiń saltanatty bólimi aıaqtalǵannan keıin ákim kópbalaly analardyń úıine kirip, taǵy bir márte quttyqtap, júrekjardy tilegin bildirdi.