Semeıde 1680 tyl ardagerine birjolǵy syıaqy berildi

SEMEI. QazAqparat – Semeı qalasynda turatyn 1680 tyl ardagerine Jeńis kúni qarsańynda birjolǵy syıaqy berildi, dep habarlaıdy QazAqparat tilshisi.

Qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminiń málimetinshe, Semeıde 1941 jylǵy 22 maýsym men 1945 jylǵy 9 mamyr aralyǵynda keminde alty aı jumys istegen 1680 tyl ardageri bar. Merekege oraı, olarǵa 50 000 teńge kóleminde birjolǵy syıaqy berildi.

Al, soǵystyń 9 ardageri men múgedegi 1,5 mln teńgeden birjolǵy kómek aldy. Lenıngrad blokadasy kezinde qalanyń kásiporyndary men uıymdarynda jumys istegen, «Lenıngradty qorǵaǵany úshin» medalimen jáne «Qorshaýdaǵy Lenıngrad turǵyny» tósbelgisimen marapattalǵan eki semeılikke 100 000 teńgeden bólindi.

«Ekinshi dúnıejúzilik soǵys kezinde kámelettik jasqa tolmaı kontslagerlerde, getto jáne basqa da májbúrlep ustaý oryndarynda tutqynda bolǵan tulǵalarǵa 100 000 teńge kóleminde kómek qarastyrylǵan. Tyldaǵy janqııarlyq eńbegi jáne minsiz áskerı qyzmeti úshin burynǵy KSRO ordenderimen jáne medaldarymen marapattalǵan 41 qala turǵynyna da 100 000 teńgeden berildi», - delingen atalǵan bólimniń aqparatynda.

Esterińizge sala ketsek, osyǵan deıin Óskemende soǵys ardagerlerine 1,5 mln teńgeden beriletindigi habarlanǵan.