Semeıde 16 adamdy jer soqtyryp ketken alaıaq ustaldy

SEMEI. QazAqparat – Semeı qalasynda 16 adamdy aldap soqqan alaıaqqa qatysty qylmystyq is qozǵaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, 22 jastaǵy Ekibastuz qalasynyń turǵyny Semeıge kelip, keńse jaldaǵan. Sol jerde ol jurtshylyqqa «Qurylys materıaldaryn arzanǵa taýyp, jetkizip beremin» dep jarnama jasaıdy.

Buǵan sengen keıbir azamattar kelisimshartqa otyryp, suraǵan aqshasyn bere salǵan. Alaıda alaıaq taýardy jetkizbeı, habar-osharsyz ketti.

«Polıtsııa qyzmetkerleri jedel-izdestirý sharalaryn júrgizip, kúdiktini qolǵa túsirdi. Qazirgi ýaqytta oǵan qatysty QR QK-niń 190-baby 3-bóligine (Alaıaqtyq) sáıkes sotqa deıingi tergeý amaldary bastaldy. Tártip saqshylary onyń basqa da ashylmaǵan qylmystarǵa qatysy bar-joǵyn anyqtap jatyr», - dedi Semeı qalalyq PB bastyǵynyń birinshi orynbasary Jandarbek Ahmetjanov.