Semeıde 136 kósheniń jaryq shamdary aýystyrylady
Bul jaıly Semeı ákimdiginde ótken jıyn barysynda shahar basshysy Baqytjan Baıahmetov málim etti.
«Semeı kóshelerin jaryqtandyrýdy jańǵyrtý» jobasy aıasynda 136 kóshege 7 659 sham ornatý nemese aýystyrý jumystary júrgizilmek. Sondaı-aq 687 baǵana men 2 602 kronshteın ornatylyp, 130 shaqyrym kabel tartý josparlanǵan. Jobaǵa sáıkes 70 kóshege Everlight óndirisiniń 2000 shamy ornatylady», - dedi ákim.
Onyń aıtýynsha, «Jumyspen qamtýdyń jol kartasy» baǵdarlamasy boıynsha Beıbitshilik, Smychka, Zaton jáne Mırnyı aýdandarynda Ertis ózeniniń jaǵalaýyn nyǵaıtý jumystary júrgizilýde.
«Halyqty taza aýyzsýmen qamtý maqsatynda Shaqaman jáne Abyraly aýyldaryna jalpy uzyndyǵy 40,3 shaqyrymdy quraıtyn sý qubyry jelilerin salý, Sýyqbulaq aýylynda 24 shaqyrymdyq sý qubyry jelilerin qaıta jańartý jumystary qolǵa alynǵan», - dedi Baqytjan Baıahmetov.