Semeıde 11 myńnan astam otbasy úı kezeginde tur
Byltyr Semeıde 112 kópbalaly otbasy turǵyn úımen qamtamasyz etilgen. Sondaı-aq kópbalaly jáne tolyq emes otbasylarǵa jáne múgedek balany tárbıelep otyrǵan januıalarǵa 20 mln teńge sommasyndaǵy 20 turǵyn úı sertıfıkaty berildi.
Bul jaıly aqparat ortalyǵynda onlaın formatta ótken baspasóz konferentsııasynda qalalyq TÚKSh jáne turǵyn úı ınspektsııasy bólimi basshysynyń orynbasary Dıana Shaıahmetova málimdedi.
«Osy jyly 22 kópbalaly otbasy qonys toıyn toılaǵan. Halyqtyń áleýmettik osal toptaryna 25 mln teńgeniń 25 sertıfıkaty tabys etildi. Budan bólek, Qaraǵaıly yqshamaýdanyndaǵy satyp alý quqyǵynsyz jalǵa beriletin kópqabatty tórt úıden 125 páter kópbalaly otbasylarǵa berilmek», - dedi ol.
Búginde qalada 11 318 otbasy turǵyn úı kezeginde tur.
Bıyl «Baqytty otbasy» baǵdarlamasy boıynsha muqtaj jáne kópbalaly otbasylaryna tólemge qabilettiligin rastaý úshin 250 joldama berildi.
«2020 jyldyń ekinshi jartysynda jergilikti atqarýshy organdardyń kezegindegi otbasylarǵa arnalǵan «Shańyraq» memlekettik baǵdarlamasy bastaldy. Turǵyn úıdi tek bastapqy naryqta ǵana satyp alýǵa bolady. Sonymen qatar Komsomol kentinde kópbalaly januıalarǵa arnalǵan 10 turǵyn úıdiń qurylysy júrgizilýde. Halyqtyń áleýmettik osal toptaryn jáne jetim balalardy úımen qamtamasyz etý úshin jyl sońyna deıin 119 páter bólý josparlanýda», - deıdi Dıana Shaıahmetova.