Semeıde 10 myńǵa jýyq adam qala kóshelerinen 80 tonna qoqys jınady

SEMEI. QazAqparat – Semeı qalasynda «Taza tabıǵat» aktsııasy aıasyndaǵy senbilikke 10 myńǵa jýyq adam jınaldy, dep habarlaıdy QazAqparat tilshisi.

Qala ákimdiginiń málimetine súıensek, búginde Semeıde «Taza tabıǵat» aktsııasy jáne kúzgi ekologııalyq aılyq aıasynda aýqymdy jalpyqalalyq senbilik ótýde. Oǵan 10 myńǵa jýyq qala turǵyndy qatysyp jatyr.

Senbilikke jergilikti halyq, memlekettik mekemelerdiń, bıýdjettik uıymdardyń, joǵary jáne orta oqý oryndarynyń, shaǵyn jáne orta bıznestiń, kóppáterli turǵyn úılerdi basqarý organdarynyń qyzmetkerleri shyqty. Sondaı-aq senbilikke «Shyǵys» óńirlik qolbasshylyǵynyń áskerı qyzmetkerleri qatysyp, Znamenka tasjolynyń boıyndaǵy irgeles aýmaqty qoqystan tazartty.

«Sanıtarlyq tazalaýdy jáne qoqysty jınaýdy qamtamasyz etýge arnaıy tehnıka, onyń ishinde 20 tıegish pen 65 samosval kóligi jumyldyryldy. «Birge taza Qazaqstan» ekologııalyq aılyǵy aıasynda qalada 2 700 kóshet otyrǵyzyldy», - delingen aqparatta.

Senbilikke qatysýshylar jınaǵan 80 tonnadan astam qoqys polıgonǵa shyǵaryldy.