Semeı jylýsyz qalýy múmkin: Qala ákimdigi depýtat kótergen máselege jaýap berdi

SEMEI. QazAqparat – Senat depýtaty Aınur Arǵynbekova Abaı oblysynyń eskirgen jylý-elektr ortalyǵy máselesin kóterip, Premer-Mınıstrge saýal joldaǵan edi. Osy rette qala basshylyǵy bul máselege túsinik berdi, dep habarlaıdy QazAqparat tilshisi.

Senator jylytý maýsymy kezinde jaǵdaıy nashar jergilikti JEO Semeı qalasy turǵyndarynyń densaýlyǵy men ómirine qaýip tóndirip otyrǵanyn aıtqan.

Onyń sózinshe, jańadan qurylǵan oblysta áleýmettik mańyzy bar obektilerdi jóndeýge qarjynyń joqtyǵy túıtkildi máselege aınaldy.

Osy rette Semeı ákimdigi atalǵan máselege oraı jaýap berdi.

«Qalanyń ınfraqurylymy qatty tozǵan. Jylý – eń kúrdeli máselelerdiń biri bolyp otyr. Bul jaıt oblys ákiminiń tikeleı baqylaýynda. Qazirgi tańda jylytý maýsymy boıynsha barlyq qajetti jumystar ýaqytyly júrgizildi. Jylý kózderiniń jabdyqtary jaramdy kúıde», - delingen aqparatta.

Semeıde jylytý maýsymy aýa raıyna baılanysty 29 qyrkúıekte bastalǵan.

Kómir qory jetkilikti. Atap aıtqanda, 40,5 myń tonnany quraıdy. Qajet bolǵan jaǵdaıda 10 kúndik qor - 28 myń tonna bar.

«Jylytý maýsymynyń tehnıkalyq jelisi boıynsha problemalar joq. Biraq ekonomıkalyq turǵyda máseleler bar. Kredıtorlyq bereshek pen jalaqynyń ýaqytynda berilmeıtini ras. Bul máseleler oblystyń qalalyq, jergilikti bıýdjetinen qarajat bólý jolymen sheshiledi. Sondaı-aq respýblıkalyq bıýdjetten sýbsıdııa bólý máselesi qarastyrylyp jatyr», - delingen habarlamada.