Semeı jylýsyz qalýy múmkin – depýtat Premer-Mınıstrden kómek surady
Senatordyń aıtýynsha, jylytý maýsymy kezinde jaǵdaıy nashar jergilikti JEO Semeı qalasy turǵyndarynyń densaýlyǵy men ómirine qaýip tóndirip otyr. Jańadan qurylǵan oblysta áleýmettik mańyzy bar obektilerdi jóndeýge qarjynyń joqtyǵy túıtkildi máselege aınaldy.
«Bıylǵy 1 qazandaǵy jaǵdaı boıynsha «Jylýkomýnenergo» MKK nesıe qaryzy 2,9 mlrd teńgege jetken, onyń ishinde jalaqy boıynsha qaryz – 318 mln teńge. Túsken barlyq qarajat jalaqy tóleýge jumsalady. Jylytý maýsymynyń úzilip qalý qaýpi bar, bul klımaty qatal aımaqtaǵy halyqtyń ómiri men densaýlyǵyna qaýip tóndiretin jaǵdaılarǵa ákelýi múmkin. Ony QR Úkimetiniń rezervinen 1,4 mlrd teńge somasynda qarjy bólý arqyly qoldaý qajet. Esep-qısap jasaldy, qarjylyq negizdeme bar», - dedi Aınur Arǵynbekova Senattyń búgingi otyrysynda.
Sonymen birge, depýtat óńirde múmkindigi shekteýli jandarǵa arnalǵan ońaltý ortalyǵynyń qurylysyn aıaqtaý týraly Prezıdent tapsyrmasyn eske saldy. Onyń qurylysyna buryn 5,4 mlrd teńge bólingen bolatyn, biraq sodan beri qurylys materıaldary men jabdyqtardyń qymbattaýyna baılanysty jobany túzetýge týra keldi.
«Bıýdjet zańnamasyna sáıkes joba qunynyń qymbattaýyna baılanysty shyǵystar jergilikti bıýdjet esebinen berilýi tıis. Alaıda, Abaı oblysynda qarjynyń jetispeýshiligin eskere otyryp, QR Úkimetiniń rezervinen 1,9 mlrd teńge qarjy bólý máselesin qaraýdy suraımyn», - dedi senator.
Depýtat qurylysy aıaqtalmaǵan kóppáterli úıler problemasyn da kóterdi. Abaı oblysynda 400 otbasyǵa arnalǵan 6 úıdiń qurylysy bitpegen. Olardyń qurylysy materıaldar baǵasynyń qymbattaýyna baılanysty toqtatylǵan. Senat depýtaty osy obektilerdiń qurylysyn aıaqtaý men jóndeý úshin jetispeıtin aqshany Úkimet rezervinen bólýdi surady.