Semeı ýnıversıtetteri qashyqtan oqytýǵa daıyn
Bul jaıly búgin qalalyq Aqparat ortalyǵynda ótken baspasóz konferentsııasynda aıtyldy. Semeı medıtsınalyq ýnıversıteti akademııalyq máseleler jónindegi basqarma tóraǵasynyń orynbasary Marat Janaspaevtyń sózine sensek, qańtar aıynda olar elektrondy oqytýǵa arnalǵan aqparattyq platformaǵa kóshken.
«Biz qashyqttan oqytýǵa ázirmiz. Aqparattyq platforma beıne jáne aýdıo dáristermen tolyqtyrylýda. Osy oraıda dybys jazatyn arnaıy stýdııa ashylyp, qashyqtyqtan oqytý algorıtmi daıyndalǵan. Nátıjesinde, stýdentterge úıde otyryp-aq bilim alýǵa múmkindik bar», - deıdi ol.
Ýnıversıtette Úndistan, Ózbekstan, Pákistan jáne Aýǵanstannan kelgen stýdentter bar.
«Biz olardyń óz elderine ketýine tyıym salmaımyz. Bul ár adamnyń tańdaý quqyǵy. Barlyǵy onlaın oqıtyn bolady. Aralarynda aýylda ınternet ustamaıtyndyǵyn aıtqandar da kezdesti. Sondyqtan olarǵa jataqhanada Wi-Fi arqyly bilim alýǵa jaǵdaı jasalǵan», - deıdi Marat Janaspaev.
Al Shákárim atyndaǵy Semeı memlekettik ýnıversıtetinde elektrondy platforma 10 jyldan astam ýaqyt boıy qoldanylyp keledi.
«Ár oqytýshy men stýdenttiń logıni men paroli bar. Bilim alýshylar jeke kabınetine kirip, tapsyrmalaryn qaraı alady. Oqý protsesi eki semestrden turady», - deıdi ýnıversıtet proektory Jandos Muqaev.
Joǵary oqý oryndarynyń ókilderi qashyqtyqtan oqytý kezinde ata-analar óz balalaryn baqylaýda ustaıdy dep senedi.