Semeı turǵynynyń úıinen esirtkiniń asa iri partııasy tabyldy

SEMEI. QazAqparat – Semeı qalasynda esirtki saýdalaýmen aınalysqan er adamnyń úıinen 25 keli marıhýana tabyldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, polıtsııa qyzmetkerleri óńir aýmaǵynda esirtki qylmysyna qarsy is-qımyldy kúsheıtýge baǵyttalǵan «Qarasora» jedel aldyn alý sharasyn jalǵastyrýda.

Shara barysynda Semeı qalasynda esirtki saýdasymen aınalysqan 38 jastaǵy turǵyn anyqtaldy. Jedel ýákilder er adamdy qylmys ústinde ustady.

Onyń úıin tintý kezinde 25 keliden astam marıhýana tabyldy.

Kúdikti marıhýananyń iri partııasyn 335 dana polıetılen paketke salyp, qala jastaryna satý úshin daıyndaǵan.

«Qazirgi ýaqytta atalǵan fakti boıynsha QR QK-niń 296-baby 4-bóligine sáıkes sotqa deıingi tergeý amaldary júrgizilýde. Sot sanktsııasymen er adam qamaýǵa alyndy», - dedi oblystyq PD bastyǵynyń orynbasary Talǵat Shaıahmetov.

Esterińizge sala ketsek, osyǵan deıin Semeıde joǵalyp ketken er adamnyń denesi tabylǵanyn habarlaǵan edik.