Semeı turǵyny tapshy dári-dármekti qymbatqa satqan

SEMEI. QazAqparat - Semeı qalasynyń turǵyny dári-dármekti zańsyz ári baǵasyn asyryp satýmen aınalysqan, dep habarlaıdy QazAqparat Qarjy monıtorıngi komıtetine silteme jasap.

Shyǵys Qazaqstan oblysy boıynsha ekonomıkalyq tergeý departamentiniń qyzmetkerleri jedel-izdestirý sharalary barysynda tapshy medıtsınalyq preparattardy zańsyz satý faktisin anyqtady.

Dári-dármekti zańsyz satýmen Semeı qalasynyń turǵyny aınalysqan. Ol «Metrıd», «Paratsetamol» «Aspırın», «Ergoferon», «Novokaın», «Lıdokaın» sııaqty tapshy preparattardy kóterińki baǵamen satpaq bolǵan.

Osy zańbuzýshylyq boıynsha materıal aıypty tulǵany ákimshilik jaýapkershilikke tartý úshin ShQO boıynsha taýarlar men qyzmetterdiń sapasy men qaýipsizdigin baqylaý departamentine joldandy.

Dárilik preparattardy joǵary baǵamen zańsyz satý faktileri boıynsha komıtettiń - 8 [phone] jáne departamenttiń – 8 [phone] senim telefondaryna habarlasýǵa bolady.