Semeı turǵyny arzan temeki alamyn dep alaıaqqa 10 mln teńge berdi

SEMEI. QazAqparat – Semeı qalasynyń turǵyny kóterme saýdamen elektrondy temeki alamyn dep alaıaqqa 10 mln teńge berdi, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, «102» jedel arnasyna qaladaǵy kolledjdiń 19 jastaǵy stýdenti habarlasqan.

Óz sózinde ol kóterme saýdamen elektrondy temeki satyp alýǵa kómektesemin degen 26 jastaǵy tanysyna 10 mln teńgeden astam qarajat bergenin jetkizdi.

Aqsha qolyna tıgennen keıin alaıaq habar-osharsyz ketken.

«Jedel-izdestirý sharalaryn júrgizgen polıtsııa qyzmetkerleri kúdiktini qolǵa túsirdi. Jaýap alý barysynda er adam óz kinásin ishinara moıyndady. Oǵan qatysty kelý týraly mindetteme túrinde bultartpaý sharasy tańdaldy», - delingen aqparatta.

Qazirgi ýaqytta atalǵan fakti boıynsha QR QK-niń 190-baby 3-bóligine sáıkes sotqa deıingi tergeý amaldary júrip jatyr.

Kúdikti 4 jylǵa deıingi merzimge bas bostandyǵynan aıyrylýy múmkin.