Semeı turǵyndary jylýǵa 400 mln teńgege jýyq qaryz bolyp qalǵan
Qalalyq aqparat ortalyǵynyń málimetine sensek, jylý maýsymynyń tórt aıynda jeke tulǵalardyń debıtorlyq bereshegi 396 mıllıon teńgeni qurasa, kommertsııalyq uıymdar men zańdy tulǵalar 204 mıllıon teńgeden astam qaryzǵa batqan.
«Biz halyqty shotty alǵannan keıin sozbalańǵa salmaı, aı saıyn tólem jasap otyrýǵa shaqyramyz. Turǵyndardyń tólem qabileti - 40 paıyz, negizinen bul - zeınetkerler men bıýdjettik uıym qyzmetkerleri. Eki aı nemese odan da kóp ýaqyt kóleminde tıisti tólem jasalmasa boryshkerlerge qatysty májbúrleý sharalary qoldanylady», - deıdi «Teplokommýnenergo» MKK satý basqarmasy basshysynyń mindetin atqarýshy Aınur Tóleýbaeva.
Onyń aıtýynsha, 2019 jyldyń aqpan aıynan bastap aqsha óndirý protsedýrasy jeńildetilgen. Birinshi abonent bul týraly habarlama alady. Odan soń eki aptanyń ishinde oryndaý týraly akt jeke sot oryndaýshysyna jiberiledi. Boryshkerdiń qaryzyna baılanysty bank shottary men múlki buǵattalady. Sondaı-aq oǵan Qazaqstan aýmaǵynan shyǵýǵa tyıym salynady. Al zańdy tulǵalarǵa birdeı sanktsııalar qoldanylady.
«Keıde abonent tólemdi ýaqtyly jasaı almaı qalatyn jaǵdaılar da bolyp jatady. Osyndaı kezde «Teplokommýnenergo» MKK-ǵa kepildeme hat daıyndap, ol jerde keshiktirýge ne sebep bolǵanyn jáne qaryzdy qashan tóleıtinin jazý qajet» - deıdi Aınur Tóleýbaeva.