Semeı polıgonynyń bir bóligin paıdalanýǵa qashan ruqsat beriledi

NUR-SULTAN. QazAqparat – QR Energetıka mınıstri Maǵzum Myrzaǵalıev Májilis qaraýynda jatqan Semeı polıgony týraly zań jobasyna qatysty pikir bildirdi, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide vedomstvo basshysyna osyndaı mándegi suraq qoıyldy.

«2015 jyly Energetıka mınıstrligi Semeı polıgonynyń jerin aýyl sharýashylyǵy maqsatta paıdalanýǵa tyıym saldy. Bıyl aımaqtaǵy kóptegen aýdandarda aýa men sýdyń jaǵdaıy adamdarǵa qaýip tóndirmeıtini týraly habarlandy. Bul Semeı polıgonynyń jerin paıdalanýǵa salynǵan tyıymnyń alyp tastalatynyn bildire me?», - dep surady BAQ ókili.

Mınıstrdiń sózine qaraǵanda, atalmysh máseleni retteıtin zań jobasy QP Parlament Májilisiniń qaraýynda jatyr.

«Qazir Májiliste bizdiń mınıstrlik jańadan jasaǵan zań jobasy talqylanyp jatyr. Bul osy Semeı polıgonyn retteıtin zań jobasy bolmaq. Biz tıisti taldaý jumystaryn júrgizdik. Sol taldaýdyń faktilerine súıensek, jalpy Semeı polıgonynyń kólemi 18 myń sharshy shaqyrymdy quraıdy. Sonyń jartysy aýyl sharýashylyq maqsatta paıdalanýǵa berýge bolatyn nemese taza telimder degen sóz. ıAǵnı, osy zań jobasy Májilis pen Senattan ótkennen keıin kórsetilgen telimder paıdalanýǵa beriledi degen úmitimiz bar», -dedi Energetıka mınıstri.