Semeı polıgonyn zalalsyzdandyrý jaıyndaǵy qazaqsha úsh tomdyq jaryq kórdi

ÓSKEMEN. QazAqparat - Semeı polıgonyn zalalsyzdandyrý jaıyndaǵy «Burynǵy Semeı synaq polıgonyn qaýipsiz kúıge keltirý jónindegi ǵylymı-tehnıkalyq jáne ınjenerlik jumystar keshenin júrgizý» atty úsh tomdyq eńbek jaryq kórdi, dep habarlaıdy QazAqparat tilshisi.

Memlekettik tilde baspa betin kórgen jınaqtyń avtorlary: N.Á.Nazarbaev , V.S.Shkolnık, E.Ǵ.Batyrbekov, S.A.Berezın, S.N.Lýkashenko, M.Q.Ysqaqov  boldy.

Buryn habarlanǵandaı, úsh tomdyqtyń aǵylshyn tilindegi nusqasynyń tusaýy 2017 jyldyń qarashasynda Astanadaǵy Beıbitshilik jáne kelisim saraıynda kesilgen bolatyn, al orys tilindegi jınaq 2016 jylǵy 29 tamyzda Astanada ótken halyqaralyq konferentsııa kezinde tanystyrylǵan.

Jınaq Qazaqstannyń, shet elderdiń ǵylymı jurtshylyǵynda úlken qyzyǵýshylyq týdyrdy. Óıtkeni QR Ulttyq ıadro ortalyǵynyń burynǵy SSP áskerı-óndiristik keshenin konversııalaý boıynsha sheteldik áriptesterimen yntymaqtastyqta júrgizgen jumystarynyń, atom energetıkasy jáne radıoekologııa qaýipsizdigi salasyndaǵy ǵylymı-tehnıkalyq yntymaqtastyqtyń qomaqty tájirıbesin qamtyǵan.

Aldaǵy ýaqytta úsh tomdyq jınaq ýnıversıtetterdiń, uıymdardyń jáne kásiporyndardyń ǵylymı-kitap qoryna, sondaı-aq elimizdegi kitaphanalarǵa taratylady.