Semeı polıgony mańyndaǵy radıatsııa deńgeıi halyq úshin qaýip tóndirmeıdi - Energetıka mınıstrligi

SEMEI. QazAqparat - Qazaqstan Respýblıkasynyń Ulttyq ıadrolyq ortalyǵy 2021 jyly Semeı synaq polıgony jerleriniń radıoaktıvti lastanýyn tekserýdi aıaqtaýdy josparlap otyr, dep habarlaıdy QazAqparat Energetıka mınıstrliginiń baspasóz qyzmetine silteme jasap.

QR Ulttyq ıadrolyq ortalyǵy 2008 jyly ıadrolyq synaqtardyń polıgon aýmaǵyna jáne oǵan jaqyn jerlerge áserin zertteý jumystaryn júrgize bastady.

Mamandar sýdyń, aýanyń, ósimdikter men janýarlar áleminiń jaǵdaıyn zertteıdi. Zertteýdiń keıbir ádisterin QR Ulttyq ıadrolyq ortalyǵy ázirlegen. Búgingi tańda polıgon aýmaǵynyń 90%-ǵa jýyǵy tekserildi.

Qorshaǵan orta jaǵdaıynyń monıtorıngi qorshaǵan orta men halyqtyń qaýipsizdigine áser etetin radıatsııalyq jaǵdaıdyń teris ózgeristerin ýaqytynda anyqtaýǵa múmkindik beredi.

Polıgon aýmaǵyndaǵy jáne odan tys jerlerdegi aýa jáne sý ortasyn zertteý úshin arnaıy zerthanalarda odan ári taldaýǵa synama alý júrgiziletin monıtorıng pýnktteri quryldy. Qazirgi ýaqytta 4 aýa ortasyn baqylaý pýnkti jáne 8 sý ortasyn baqylaý pýnkti bar. Barlyǵy 22 monıtorıng pýnktin qurý josparlanýda.

Júrgizilgen monıtorıng nátıjeleri aýadaǵy radıoaktıvti elementterdiń eń kóp mólsheri tikeleı ıadrolyq synaqtar júrgiziletin jerden tabylǵanyn kórsetti. Bul rette polıgonnyń lastanǵan ýchaskelerinen tys «uzaq ómir súretin» radıoaktıvti elementter (amerıı, tsezıı nemese strontsıı) tabylǵan joq.

Nátıjesinde, monıtorıng jalpy polıgonda jáne odan tys jerlerde aýa jáne sý ortasynyń aǵymdaǵy radıatsııalyq jaı-kúıi turaqty jáne halyq úshin qaýip tóndirmeıtinin kórsetti. ıAdrolyq synaqtar júrgizilgen synaq alańdarynyń radıoaktıvti lastanǵan ýchaskeleri buǵan jatpaıdy.

Aıta ketken jón, 2021 jyly Semeı synaq polıgonynyń jabylýyna 30 jyl tolady.