Semeı polıgony aýmaǵynda týǵan qazaqstandyqtar jańa kómek ala alady

NUR-SULTAN. QazAqparat - Semeı synaq polıgony aýmaǵynda 1949-1965, sondaı-aq 1966-1990 jyldar aralyǵynda ómir súrgen azamattar eGov.kz portalynda jańa qyzmettiń kómegimen memleketten tólem ala alady, dep habarlaıdy QazAqparat.

Memlekettik qyzmettiń kómegimen azamattarǵa jeńildikter men ótemaqylarǵa quqyǵyn rastaıtyn kýálik alý múmkindigi beriledi. Jańa qyzmet eGov.kz portalynda tegin kórsetiledi jáne 2022 jyldan bastap qoljetimdi. Qyzmet iske qosylǵannan beri 311 azamat onlaın rejıminde kýálik pen ótemaqy alýǵa ótinish berdi.

Osyndaı qyzmet elimizdegi HQKO-nyń kómegimen de kórsetiledi. Tek 2021 jyldyń ózinde 7 myńǵa jýyq adam qaǵaz túrinde ótinish bergen.

«Bul qyzmet buryn HQKO arqyly qaǵaz túrinde ǵana kórsetiletin. Azamattaǵa yńǵaıly bolý úshin memlekettik organdarmen birlesip, qyzmetti onlaın formatqa kóshirdik. Bul Semeı óńiriniń turǵyndary úshin óte mańyzdy ári qajetti qyzmet dep oılaımyz. «UAT» AQ ujymynyń atqarǵan jumysynyń arqasynda onlaın memlekettik qyzmetterdiń tizimi kúnnen-kúnge ósip keledi», - dep «UAT» AQ basqarma tóraǵasy Rostıslav Konıashkın atap ótti.

Qyzmetti paıdalaný úshin egov.kz portalyna kirip, basty bette «Áleýmettik qamsyzdandyrý» bólimin ashyp, «Otbasylarǵa kómek» tarmaǵyn tańdap, qajet qyzmetti tańdaý qerek. Ári qaraı, paıdalanýshy:

- portalda avtorızatsııalanady;

- onlaın qyzmetke tapsyrys beredi;

- barlyq qajetti joldardy toltyrady;

-ETsQ nemese eki faktorly aýtentıfıkatsııa kómegimen ótinimge qol qoıady.

Memlekettik qyzmetti kórsetý nátıjesi 20 jumys kúni ishinde daıyn bolady.