Semeı perzenthanasynyń kredıttik boryshy ósip jatyr, ǵımaraty tozǵan – depýtat
Jazǵy demalysta depýtat Abaı oblysynyń turǵyndarymen jáne medıtsınalyq qyzmetkerlerimen kezdesken.
«Abaı oblysy boıynsha medıtsınalyq qyzmet kórsetýge qatysty koeffıtsıentterdi ózgertý qajet. Oblystaǵy jylytý koeffıtsıenti Shyǵys-Qazaqstan jáne Soltústik Qazaqstan, Qaraǵandy oblystaryna qaraǵanda tómen. Bul oblystyń klımattyq jaǵdaıyna qaraı, 6 aı qys bolýyna baılanysty aýrýhanalardy jylýmen tolyq qamtamasyz etýge keri áserin tıgizedi. Jedel járdem qyzmetinde jan basyna shaqqandaǵy normatıvtik qarjylandyrýdyń bazalyq tarıfin aımaqtaǵy eldi mekenderdiń araqashyqtyǵyn, aýrý qurylymyn, sanyn eskere otyryp, ulǵaıtý kerek. Oblysta jedel járdem kólikteri eskirgen, olardy jańartý men qyzmetkerlerdiń arnaıy jumys kıimin alýyna tıisti qarajat bólinýi qajet», - dedi N. Sabılıanov Densaýlyq saqtaý mınıstrine joldaǵan saýalynda.
Oblysta Semeı polıgonynan zardap shekken aýdandardyń ekologııalyq koeffıtsıentteri de basqa ekologııalyq aımaqtarǵa jatatyn óńirlerden tómen. Mysaly, Abaı oblysynyń qalalary men aýdandaryndaǵy ekologııalyq koeffıtsıentter Shyǵys Qazaqstan oblysynyń aýdandary men Qyzylorda oblysynyń Aral aýdanyndaǵy, Baıqońyr qalasyndaǵy koeffıtsıentterden tómen. Bul oblystaǵy medıtsına qyzmetkerlerine tıisti ústeme aqy alýǵa múmkindik bermeıdi.
Polıgon saldarynan zardap shekken azamattardyń kópshiliginde turaqty jumys joq. Olar mindetti medıtsınalyq saqtandyrý jarnalaryn tóleı almaǵandyqtan tolyq kólemde medıtsınalyq kómek ala almaı otyr.
Sonymen birge, azamattar aýrýhanalarda elektrondyq portal arqyly emdelýi úshin kezek pen kvotany keminde 1-2 aı kútedi. Aqparattyq júıe durys jumys istemeıdi. Semeı turǵyndary emhanalarda aptasyna 1 ret qabyldaýǵa kire alady. Bul halyqtyń ýaqytyly emdelýine kedergi týdyrýda.
«Oblystaǵy perınataldyq ortalyqtyń kredıttik boryshy kóbeıip keledi, onyń ǵımaraty eskirgen jáne kóp jyldar boıy kúrdeli jóndeý júrgizilmegen. Oǵan qosa, Semeı qalasynyń ıadrolyq medıtsına jáne onkologııa ortalyǵyna qosymsha ǵımarat salyp, tıisti materıaldyq-tehnıkalyq bazamen qamtamasyz etý kerek», - dedi Nurtaı Sabılıanov.