Semeı ormanyndaǵy órt: Qaraǵandy ýnıversıteti 10 grant usyndy

QARAǴANDY. QazAqparat – Akademık E. A. Bóketov atyndaǵy Qaraǵandy ýnıversıteti Abaı oblysynda orman órtinen zardap shekken otbasylarda tárbıelenip otyrǵan balalarǵa 10 bilim berý grantyn beredi. Mundaı sheshimdi JOO basshylyǵy qabyldady, dep habarlaıdy QazAqparat tilshisi.

«Bizdiń ýnıversıtet Abaı oblysynyń turǵyndaryna áser etken úlken qıynshylyqtan tys qala almady. Olardy osyndaı qıyn kezeńde qoldaý kerek dep sheshim qabyldadyq. Osy maqsatta orman órtinen zardap shekken otbasylardan shyqqan balalarǵa ýnıversıtet qabyrǵasynda tegin oqýǵa 10 grant berýge daıynbyz. Qaza tapqandardyń otbasylaryna shyn júrekten kóńil aıtamyz», – dedi QarÝ rektory apparatynyń basshysy Serik Qalqamanov.

Sonymen qatar ýnıversıtet volonterleri orman órtinen zardap shekkenderge gýmanıtarlyq kómek jınaýǵa kómektespek.

Aıta keteıik, 40-tan astam qazaqstandyq JOO órtten zardap shekken otbasylardyń stýdentterine óz granttary men jataqhanalardaǵy oryndaryn berýge daıyn.