Semeı ormanyndaǵy órt: Asyraýshysynan aırylǵan balalarǵa sabaqqa bararda bar jaǵdaı jasalady - mınıstr

ASTANA. QazAqparat - Abaı oblysynda orman órti bolǵan aýmaqta balalardyń qaýipsizdigin qamtamasyz etý baǵytynda kúsh jumyldyrylýda. Osy kúnderi mınıstrliktiń aýmaqtyq departamentiniń, Balalardyń quqyqtaryn qorǵaý komıtetiniń jáne oblystyq bilim basqarmasynyń ókilderi balalarmen jumystar júrgizýde. Bul týraly QR Oqý-aǵartý mınıstri Ǵanı Beısembaev Feısbýktegi paraqshasynda málimdedi.

«Memleket basshysynyń tapsyrmasyna sáıkes mınıstrlik birqatar sharalar qabyldaýda. Oqıǵa oryn alǵan aımaqta balalardyń qaýipsizdigin qamtamasyz etý baǵytynda kúsh jumyldyrylýda. Osy kúnderi mınıstrliktiń aýmaqtyq departamentiniń, Balalardyń quqyqtaryn qorǵaý komıtetiniń jáne oblystyq bilim basqarmasynyń ókilderi balalarmen jumystar júrgizýde.

Sonymen qatar, Balalardyń quqyqtaryn qorǵaý komıteti tóraǵasyna asyraýshysynan aıyrylǵan otbasylarmen jeke kezdesip, balalardyń psıhologııalyq keńes alýyna, jazǵy saýyqtyrý lagerlerinde demalýyna barlyq jaǵdaılardy uıymdastyrý tapsyryldy.

Qaýipsiz aımaqqa evakýatsııalanǵan turǵyndardyń arasynda 64 bala bar. Búginde olar otbasylarymen birge Semeı qalasyndaǵy eki kolledj ǵımaratyna ornalastyrylǵan.

Sondaı-aq evakýatsııalanǵan 9,11 synyp túlekteriniń qorytyndy emtıhandy kedergisiz tapsyrýy úshin barlyq jaǵdaı jasalýda — mektep bitirý emtıhandary Semeı qalasynda uıymdastyrylady», - dep jazdy mınıstr.

Odan bólek, vedomstvo basshysy apat saldarynan asyraýshysynan aıyrylǵan otbasy balalary jańa oqý jylynda bilim alýyn esh kedergisiz jalǵastyrýy úshin mektep formasymen, qajetti oqý quraldarymen jáne ystyq tamaqpen qamtylatynyn aıtty. Balalardyń quqyqtaryn qorǵaý men qaýipsizdigin qamtamasyz etý mınıstrliktiń únemi baqylaýynda.