Semeı ormanyn qalpyna keltirýge qansha ýaqyt ketedi

ASTANA. QazAqparat – Ol úshin ondaǵan jyl kerek. Abaı oblysynda órtke oranǵan ormandy qalypqa keltirýge qansha ýaqyt ketetinine qatysty jaýap bergen Ekologııa jáne tabıǵı resýrstar mınıstri Zúlfııa Súleımenova osylaı málimdedi, dep habarlaıdy QazAqparat tilshisi.

«Qazir shamamen 60 myń gektar dep aıtyp jatyrmyz. Bul jerde órttiń oqshaýlanǵanǵa deıingi aýmaǵyn aıtyp otyrmyz. Al ormandy qalypqa keltirýge qansha ýaqyt ketedi? Órtten keıin qyzmettik tekseris júredi. Alǵashqy kezeńde janǵan aýmaqty tazartý jumystary atqarylady. Oǵan shamamen 3-4 jyl ketedi. Ormandy qaıta qalpyna keltirý - óte kúrdeli is. Ol úshin ondaǵan jyl kerek», - dep jaýap berdi mınıstr jýrnalısterdiń saýalyna oraı.

Eske sala keteıik, Semeı tabıǵı rezervatynda qyzyl jalyn 8 maýsym kúni tutandy.

Ottyń taralýy toqtatyldy, alaıda tolyǵymen óshirý jumystary jalǵasyp jatyr.

Tilsiz jaý saldarynan 14 ormanshy qaza boldy.