Semeı ormany taǵy órtke orandy: 3 óńirden qutqarýshylar men tikushaqtar jumyldyryldy

SEMEI. QazAqparat – Abaı oblysynyń «Semeı ormany» tabıǵı rezervatynda tutanǵan órtti sóndirý áli jalǵasyp jatyr, dep habarlaıdy QazAqparat tilshisi.

Tótenshe jaǵdaılar mınıstrliginen málim etilgendeı, qazir órtti sóndirýge barlyǵy 158 adamnan turatyn «Semeı ormany» memlekettik orman tabıǵı rezervaty, Abaı oblysy Tótenshe jaǵdaılar departamenti, jergilikti atqarýshy organdar men Qorǵanys mınıstrliginiń jeke quramy jáne tehnıkalary jumyldyrylǵan. Sondaı-aq Óskemen, Astana, Qaraǵandy qalalarynyń qutqarý bólimshelerinen qyzmetkerler men arnaıy quraldar jiberildi.

«Tańerteń saǵat 06:00-de órt ornyna «Qazavıaqutqarýdyń» qosymsha eki tikushaǵy ushyp shyǵady. Sonymen qosa, munda Astana, Qaraǵandy jáne Óskemen qalalarynan qutqarý bólimsheleriniń qyzmetkerleri jiberildi. Qazirgi ýaqytta órtti sóndirý jalǵasyp jatyr», - dep málim etti Tótenshe jaǵdaılar mınıstrliginiń ókili.

Belgili bolandaı, órt týraly habarlama búgin saǵat 12:03-te túsken. Qyzyl jalyn Batpaı orman alqabyndaǵy 66-shy kvartal aýmaǵynda tutanǵan.