Semeı ormanshylarynyń jaǵdaıy qıyn, biraq bıýdjetten kómek bere almaımyz – ákim

<p>Abaı oblysynyń ákimi Nurlan Uranhaev Semeıdegi orman órti men onyń sebepteri týraly alǵash ret pikir bildirdi, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.&nbsp;</p>

«8 maýsym – Abaı oblysy úshin qýanyshty ári qaıǵyly kún. Dál osy kúni Abaı oblysy qurylsa, týra bir jyldan keıin Semeı ormany órtenip, 15 otandasymyzdan aıyrylyp qaldyq. Abaı oblysyndaǵy órt qaıdan shyqty? Bul jóninde resmı pikir bildirgen joqsyz», - degen suraq qoıdy Jibek Joly telearnasynyń «Ýáde» baǵdarlamasynda júrgizýshi Erbolat Muhamedjan.

Ákim óz jaýabynda eń aýyr tıgeni – jerlesterdiń qurban bolǵany, qaza tapqandardyń otbasyna tolyq járdem berilgenin aıtty.

Barlyq 15 otbasyna baspana jáne «Qazaqstan halqyna» qorynan qarajat bólingen.

«Orman rezervaty – erekshe qorǵalatyn aýmaq. Ol basqa vedomstvoǵa, Ekologııa mınıstrligine qarasa da, el men jer bizdiń oblysymyzda, jaýapkershilik bizde. Biz ákimshilik tarapynan barlyq kómekti kórsetip otyrmyz, kórsete beremiz de. Biraq osy mınıstrlikke, orman komıtetine aıtarymyz – ormanshylarǵa nazar aýdarý kerek. Bul turǵyda kóp problema bar. Eń aldymen tehnıkasy ábden tozǵan, odan keıin ormanshylardyń aılyǵy óte az, ony da sheshý kerek. Árıne, tilsiz jaýmen kúresý kerek, biraq aldyn alý jumystaryn da umytpaǵan jón», - dedi N. Uranhaev.

Oblys ákiminiń aıtýynsha, ǵarysh monıtorınginiń órt týraly aqparaty jetkenshe biraz ýaqyt ótip ketedi. Ormanshylardyń da órtti qadaǵalaý tásilderi eskirgen.

«Ormanshylar áli kúnge deıin qolyna dúrbi alyp, dóńniń ústine qaraýylǵa shyǵady. Al bizde drondar bar, ol tútindi baıqasa, sıgnal jiberedi. Dronnyń ózi asa qymbat dúnıe emes. Osyndaı zamanaýı tehnologııalardy qoldaný kerek. Bylaı qarasańyz ormanshylarda ratsııa da joq. Biz olarǵa óz bıýdjetimizden kómek bere almaımyz, sebebi bıýdjetterimizdiń deńgeıi bólek. Olar respýblıkalyq bıýdjetten qarjylandyrylady, biz – jergilikti bıýdjetpiz. Sondyqtan basqa qorlar arqyly múmkindiginshe kómek berip jatyrmyz, mınıstrlikke de ormanshylarǵa nazar aýdarý keregin eske salǵym keledi», - dedi oblys ákimi.

Nurlan Uranhaev ormanshylar máselesi týraly Premer-Mınıstrge, burynǵy Ekologııa mınıstrine hat jazǵanyn aıtty.

«Bul órt adamı faktordan emes, naızaǵaıdan shyqqan. Degenmen mınıstrlikpen de, ormanshylarmen de jumys isteýge daıynbyz. Qor qarajatyna tehnıka satyp alaıyn dep jatyrmyz, biraq másele bulaı sheshilmeıdi. Ony mınıstrlik júıeli túrde sheshýi kerek. Kerek bolsa, tehnıka satyp alýy kerek, ormanshylardyń jalaqysyn kóterýi kerek. Sonda ǵana másele túbegeıli sheshimin tabady», - dedi Abaı oblysynyń ákimi.

Buǵan deıin Nurlan Uranhaev Semeıdiń ekonomıkalyq zertteýlerde sońǵy orynda turǵanyna pikir bildirgen edi.