Semeı ormanyndaǵy órt: Bir jyl ótkende rezervat fılıalynyń basshysy ustaldy

<p>SEMEI. KAZINFORM — Ótken jyldyń jazynda shyqqan aýqymdy órtke baılanysty Memleket basshysy quqyq qorǵaý organdaryna ormandy zańsyz kesýge jáne aǵashtardy urlaýǵa qarsy kúres sharalaryn kúsheıtýdi tapsyrdy. ІІM atalǵan tapsyrmany oryndaý aıasynda osy saladaǵy qylmystyq shemalardy anyqtaý jáne jolyn kesý boıynsha júıeli jumys júrgizip keledi, dep habarlaıdy Polisia.kz.</p>

— 9 shildede Abaı oblysynyń aýmaǵynda ІІM jáne UQK jedel ýákilderi prokýratýranyń úılestirýimen «Semeı ormany» memlekettik orman tabıǵı rezervaty fılıaldarynyń biriniń dırektorynyń basshylyǵymen áreket etken qylmystyq toptyń qyzmetine tosqaýyl qoıdy. Ormandy jymqyrdy degen kúdikpen polıtsııaǵa 20-dan astam adam jetkizildi. Tintý júrgizilip, urlanǵan aǵashtardyń ondaǵan tekshe metri, aǵash óńdeý stanoktary, aqsha jáne qujattar tárkilendi. Fılıal dırektory men qylmysqa qatysýshylar ýaqytsha ustaý ızolıatoryna qamaldy, — dedi ІІM uıymdasqan qylmysqa qarsy kúres departamentiniń ókili Qýandyq Alpys.

Sondaı-aq kúdiktilerdiń laýazymdyq ókilettigin asyra paıdalaný, para alý, múlikti jymqyrý faktilerine qatysy bar-joǵy tekseriledi.

Qazirgi ýaqytta tergeý jalǵasyp jatyr.

— Esterińizge sala keteıik, qańtar aıynda Pavlodar oblysynda «Ertis ormany» respýblıkalyq memlekettik mekemesiniń dırektorynyń basshylyǵymen áreket etken qylmystyq top ustalǵan bolatyn. Kúdiktilerge qatysty uıymdasqan qylmystyq top qurý, oǵan basshylyq etý, múshe bolý faktileri boıynsha is tergelýde. Bul baǵyttaǵy jumys jalǵasýda, — dedi Qýandyq Alpys.