Semeı ormanyndaǵy órt ádeıi uıymdastyryldy ma – mınıstrdiń jaýaby

<p>Ekologııa jáne tabıǵı resýrstar mınıstri Erlan Nysanbaev bıyl Abaı oblysy Semeı ormany rezervatynda bolǵan órttiń ádeıi jasalaýy múmkin be, degen saýalǵa jaýap berdi, dep habarlaıdy Kazinform.</p>

«Abaı oblysyndaǵy orman órti boıynsha múddeli memlekettik organdar ókilderiniń arasynan qurylǵan arnaıy komıssııanyń qorytyndysy bar. Onda órtke sebep naızaǵaı dep naqty aıtylǵan. Naızaǵaı túsken aǵash dáleli bar. Biz resmı nusqany ustanamyz. Qasaqana órteýge qatysty tergeý nátıjelerin kúteıik, sodan keıin túsinikti bolady. Biz ormandardyń ádeıi órtenip jatqany týraly áńgimelerdi únemi estip jatamyz», - dedi Erlan Nysanbaev OKQ-de ótken brıfıngide.

Ekologııa mınıstriniń aıtýynsha, sońǵy 30 jylda qasaqana órteý faktileri tirkeldi.

«Biz ony jasyrmaımyz, biraq sońǵy jyldary jaz óte qurǵaq boldy jáne tabıǵatty qorǵaý kásiporyndary naýryzdan qazanǵa deıin qarbalas rejımde jumys isteıdi. Statıstıka kórsetip otyrǵandaı, órttiń 70%-y dalalyq jerde tirkeledi. Odan bólek naızaǵaı sebep. Meniń tájirıbemde Semeı oblysynda jumys istegen kezimde táýligine 25 naızaǵaı bolýy múmkin edi», - dep tolyqtyrdy vedomstvo basshysy.