«Semeı ormanyndaǵy» alapat órtten qaza bolǵan órt sóndirýshiler men ormanshylarǵa eskertkish ashyldy

<p>SEMEI. KAZINFORM &ndash; &laquo;Semeı ormany&raquo; rezervatynda byltyr shyqqan alapat órtten 14 adam kóz jumǵan edi. Keıin jalynnyń taǵy da bir adamnyń ómirin jalmaǵany belgili boldy. Marqumdardyń qurmetine Abaı oblysy Borodýlıha aýdanynda eskertkish ashylyp otyr.</p>

Borodýlıha aýdanyndaǵy Kamyshenka ormanshylyǵynyń mańy men respýblıkalyq kúre joldyń boıynda ornalasqan. Batyldyq pen adaldyqtyń sımvolyna aınalyp, tabıǵatty qorǵaımyn dep mert bolǵan órt sóndirýshiler men ormanshylardy qurmetteý maqsatynda qoıylǵan kompozıtsııanyń avtory — músinshi Nurbol Qalıev. 

Foto: Abaı oblysy ákimdigi

Granıt tuǵyrǵa ornatylǵan segiz metrlik eskertkish marqumdardyń batyldyǵy men óz isterine degen adaldyǵyn beıneleıtin releftermen bezendirilgen. Eskertkishtiń ashylýynda sóz alǵan Abaı oblysynyń ákimi Nurlan Uranhaev batyrlardyń erlik dańqy óshpeıtindigin aıtty. 

«Qara ormandy qadirlep, batyldyq pen batyrlyqtyń jarqyn úlgisin kórsetkender urpaq jadynda máńgi saqtalady. Bul tuǵyrtas tabıǵattyń tosyn minezine tótep bergen azamattardyń atyn áıgileý úshin arnaıy qoıylyp otyr. Esimderi tarıh taqtasyna altyn árippen jazylyp, urpaǵy maqtan eter jerlesterimizge, biz qashanda basymyzdy ıemiz!», - dedi ol.

Sharada qaza bolǵan ormanshylardyń týystary sóz sóıledi. Solardyń biri Araı Ámirhanova eskertkish batyrlarǵa qurmet ekenin atap ótti.

Foto: Abaı oblysy ákimdigi

«Ashylǵan eskertkish beıbit kúnniń batyrlaryna kórsetilgen qurmet dep esepteımin. Memleket tarapynan kórsetilgen qoldaýdy sol qaıǵyly kúnnen beri sezinip kelemiz. Biri jarynan, biri ulynan, biri aǵa-baýyrynan aıyrylǵan qaıǵyly jaǵdaıdy el bolyp birge ótkerdik. Búgin mine eńseli eskertkish ornatyldy. Alǵash ret bizben kezdeskende Memleket basshysy Qasym-Jomart Toqaev barlyq kómekti alasyzdar dep aıtqan bolatyn. Prezıdentimizge qoldaý kórsetip, kómek qolyn sozǵany úshin zor alǵys bildiremin. Barlyq kómekti aldyq, oǵan myń da bir alǵys» - dedi Araı Ámirhanova.

Eske salsaq, byltyr «Semeı ormanynda» órt shyǵyp, 15 adamnyń ómirin jalmaǵan bolatyn.  Osydan keıin 12 maýsym elimizde jalpyulttyq aza tutý kúni bolyp jarııalanǵan.