Semeı oblystyq tarıhı-ólketaný murajaıy fotokórmemen Astanaǵa keledi

ASTANA. 9 shilde. QazAqparat - 10 shilde kúni Qazaqstan Respýblıkasy Tuńǵysh Prezıdenti Mýzeıinde Semeı oblystyq tarıhı-ólketaný murajaıynyń 130 jyldyq mereıtoıyna arnalǵan «Semeı zamana aǵymynda» atty fotokórmeniń ashylýy bolady.

QR Tuńǵysh Prezıdentiniń murajaıynan málim etkendeı, kórme Mýzeıaralyq seriktestik jobasynyń aıasynda uıymdastyrylýda. Óskemen men Pavlodardan bastaý alǵan kóshpeli kórme Almatydaǵy Qazaqstan Respýblıkasynyń Ortalyq Memlekettik mýzeıinde qoıylyp, endi Elordasy Astana qalasynda óz jumysyn jalǵastyrady.

Ertis ózeniniń jaǵalaýynda ornalasqan Semeı qalasy kóptegen qıly zamannan ótip, mańyzdy tarıhı oqıǵalardyń kýási boldy. Osy oqıǵalardyń fotosýretteri barsha qazaq halqynyń tarıhı, mádenı jáne rýhanı damýynda mańyzdy ról atqarǵan qala tirshiliginiń barlyq salalaryn qamtıtyn qurylysynyń kýágerleri ispettes.

Qala qazaq ádebıeti, ǵylym men óneriniń negizin qalaýshylardyń otany bolyp tabylady. Bul - uly Abaıdyń, ǵulama fılosof Shákárim Qudaıberdiulynyń, álemge tanymal jazýshy Muhtar Áýezovtiń, ánshi Ámire Qashaýbaevtyń týǵan jeri, alashordalyqtardyń shyǵarmashylyq qyzmeti de osy qalamen tyǵyz baılanysty.

Kórme ekspozıtsııasyna Semeıdiń oblystyq tarıhı-ólketaný mýzeıiniń altyn qorynan alynǵan qalanyń HІH-HH ǵǵ. biregeı fotosýretterimen qatar jańa qalanyń kórinisteri - barlyǵy 80-ge jýyq fotosýretter qoıylady.

XIX ǵasyrdaǵy Semeı qalasynyń eski kórinisteri men shet alqaptary beınelengen túsirilimderi áýesqoı-fotosýretshi F. Treırovtiń, Semeıdegi fotosheberhana ıesi I. Dıýkov jáne K.N. Mogılevtsevtiń jumystary men HH ǵasyr - F.N. Belolıýdovtyń fotosýretterimen kórinis tapqan. Al qazirgi zamanaýı túsirilimderdiń avtorlary fotosýretshiler Vl. Pavlýnın, P. Ýkolov jáne «Fotolend» fotosalonynyń qyzmetkerleri bolyp tabylady.

Kelýshiler kórmege qoıylǵan fotosýretter arqyly Semeıdiń eski beınesimen onyń turǵyndaryn, qazirgi kezdegi kórinisterimen salystyrýǵa múmkindik alady.

Kórme qonaqtary alǵash ret fotoapparattardyń ár túrlerin tamashalaıdy. Astananyń turǵyndary men qonaqtary, ásirese jas óspirim kelýshiler, zamanaýı tsıfrly fotoapparattarǵa negiz salǵan úlgilermen tanysa alady. Olar - «Fotokor-1», «FK-13h18», «Smena 8M SSSR» jáne taǵy da basqa. Olardyń denin Semeı qalasynyń kollektsııa jınaýshylary A. Hmelev pen E. Mıhaılovtar tapsyrǵan.