Semeı mashına jasaý zaýytynyń qyzmetkerleri jalaqylaryn ala almaı júr

SEMEI. QazAqparat – Semeı qalasyndaǵy mashına jasaý zaýyty qyzmetkerlerine jalaqy tólenbeýi máselesin Abaı oblysynyń ákimi Nurlan Uranhaev óz baqylaýyna aldy, dep habarlaıdy QazAqparat tilshisi.

Áleýmettik jelide «Semeı mashına zaýyty» AQ qyzmetkerlerine jalaqynyń keshiktirilýine qatysty vıdeo tarady. Abaı oblysynyń ákimi Nurlan Uranhaev atalǵan másele boıynsha shuǵyl keńes ótkizip, zaýyt basshylyǵyna naqty tapsyrmalar berdi.

«Keńeske kompanııa basshylyǵy men jaýapty memlekettik mekemelerdiń ókilderi qatysty. Nurlan Uranhaev kásiporyn qyzmetkerleriniń, onyń ishinde buryn eńbek sharttary buzylǵan qyzmetkerlerge de bereshekti óteýdi jedeldetýdi tapsyrdy. Óńir basshysynyń tapsyrmasy aıasynda «Oljakol» kompanııasy kásiporyn qyzmetkerleriniń ókilderimen birlesip, jalaqy boıynsha bereshekti kezeń-kezeńimen óteý kestesin jasaýy tıis», - delingen baspasóz málimdemesinde.

Sondaı-aq, jumysshylardyń aryzyna sáıkes eńbek ınspektsııasy «Semeı mashına jasaý zaýyty» AQ-ǵa qatysty jospardan tys tekserý taǵaıyndady.

Osy másele boıynsha 12 shildede qaıtadan jınalys ótedi. Onda oblys ákimi bergen tapsyrmalardyń oryndalýy qaralyp, qoldanystaǵy zańnama sheńberinde tıisti sharalar qabyldanady.