Semeı mashına jasaý zaýyty qyzmetkerlerine jalaqy tólene bastady

SEMEI. QazAqparat – Semeı mashına jasaý zaýytynyń jańa ınvestory – «Oljakol» JShS qyrkúıek aıyna deıin jalaqy bereshegin tolyǵymen qaıtarýdy josparlap otyr, dep habarlaıdy QazAqparat Abaı oblysynyń ákimdigine silteme jasap.

SMZ jumysshylarynyń eńbekaqysynyń keshiktirilýi aımaqtaǵy ózekti máselelerdiń biri deýge bolady. Jaǵdaı oblys ákimdiginiń turaqty baqylaýynda. Aımaq basshysy atalǵan daýly máseleni sheshý úshin birneshe ret arnaıy keńester ótkizip, zaýyt basshylyǵyna kásiporyn jumysshylarynyń, sonyń ishinde eńbek sharty buryn buzylǵan qyzmetkerlerdiń jalaqy bereshegin óteýdi jedeldetýdi tapsyrdy.

Oblys ákimdigi, jańa ınvestor men jumysshylar ókilderiniń birlesken jumysynyń arqasynda máseleni sheshýdiń naqty tetikteri qabyldandy.

Máselen, 2023 jyldyń 10 shildesinde «Oljakol» JShS men «Semeı mashına jasaý zaýyty» AQ eńbek ujymy aldyndaǵy qaryzdy óteý jáne 2023 jyl ishinde jalaqyny ýaqtyly tóleý týraly memorandýmǵa qol qoıdy.

Búgingi deıin 106 qyzmetkerge osy jyldyń qańtar jáne aqpan aılarynyń jalaqysy óteldi. Memorandýmǵa sáıkes qalǵan bereshek somma qyrkúıek aıynyń sońyna deıin qaıtarylady.

Qazirgi ýaqytta maýsym aıynyń jalaqysyn aýdaryp jatyr. Maýsym aıy úshin aılyq qarajat 17 shildege deıin tólenedi.

Buǵan deıin Semeı mashına jasaý zaýytynyń qyzmetkerleri jalaqylaryn ala almaı júrgeni habarlanǵan edi.