Semeı kóshelerin jaryqtandyrýǵa 2,4 mlrd teńge jumsalmaq

SEMEI. QazAqparat – Semeı qalasyndaǵy kóshelerdi jaryqtandyrýǵa 2,4 mlrd teńge jumsalady, dep habarlaıdy QazAqparat tilshisi.

Abaı oblysynyń ákimi Nurlan Uranhaev Eýropalyq qaıta qurý jáne damý banki Qazaqstan boıynsha dırektorynyń orynbasary Baqtııar Faızeevpen kezdesti.

«Qazirgi ýaqytta biz Abaı oblysynda úsh jobany júzege asyryp jatyrmyz. Atap aıtqanda, sýmen jabdyqtaýdy jańǵyrtý, Semeı qalasyndaǵy kóshelerdi jaryqtandyrý jáne Aıagózdegi káriz qubyrlaryn tazartý qurylystary», - dep atap ótti EQDB ókili.

Sýmen jabdyqtaý jobasy aıaqtalýǵa jaqyn. Al Semeı qalasynyń kóshelerin jaryqtandyrý úshin 7 myńǵa jýyq jaryq núktesi jetispeıdi. EQDB baǵalaýy boıynsha, bul úshin 2,4 mlrd teńge qarajat qajet. Onyń 500 mln-ǵa jýyǵy oblys ákimdiginiń bıýdjetinen bólinse, qalǵan bóligi atalǵan bankten nesıe túrinde alynady.

Nurlan Uranhaev jaryqtandyrý jumystary tek ortalyq kóshelerde ǵana emes, búkil qala boıynsha júrgizilýi tıis ekendigin jetkizdi.