Semeı qalasynda Abaı eskertkishine gúl shoqtaryn qoıý rásimi ótti

SEMEI. QazAqparat – Ǵalymdar, qoǵam qaıratkerleri, zııaly qaýym, depýtattar, jastar búgin uly jazýshy, aqyn, aǵartýshy Abaı Qunanbaevtyń eskertkishine gúl shoqtaryn qoıdy, dep habarlaıdy QazAqparat Abaı oblysynyń ákimdigine silteme jasap.

Saltanatty sharaǵa qatysqan Abaı oblysynyń ákimi Nurlan Uranhaev bul shara uly tulǵaǵa taǵzym etý ǵana emes, el tarıhynda baǵa jetpes mura qaldyryp, óshpes iz qaldyrǵan aqynnyń ómiri men shyǵarmashylyǵyn nasıhattaýǵa da qurmet kórsetilip otyrǵanyn atap ótti.

«Zamanalar aýysyp, dúnıe dıdary, kúnde ózgerse de, halqymyzdyń Abaıǵa degen, qurmet sezimi, esh kemimeıdi! Úkimettiń qaýlysymen belgilengen osy kún de – sonyń aıǵaǵy. Aqynnyń mol murasy – baǵa jetpes, rýhanı asyl qazynamyz bolyp qala beredi. Qalyń elin, qaıran jurtyn «jeti qarańǵy túnde» adastyrmaı, «bes dushpannan» boı sýytyp, «bes asyl iske» asyqtyrǵan Uly Abaı týǵan halqymen máńgi jasaıdy! Sebebi, osynaý almaǵaıyp zamanda, súıenerimiz de, tabynarymyz da – Abaı!» - dedi oblys basshysy Nurlan Uranhaev.

Merekege oraı, 8 tamyzdan bastap Abaı oblysynyń barlyq qala men aýdandarynda 50-den astam mádenı-tanymdyq is-sharalar ótkizilip jatyr.

Esterińizge salsaq, 2020 jyly 10 tamyz Qazaqstanda «Abaı kúni» bolyp belgilendi.