Semeı qalasyn damytýdyń Bas josparyn jańartý qajet - Prezıdent

SEMEI. QazAqparat – Memleket basshysy Qasym-Jomart Toqaev Abaı oblysy jurtshylyǵymen kezdesýinde óńirdiń týrıstik áleýeti týraly aıtty, dep habarlaıdy QazAqparat Aqordaǵa silteme jasap.

«Óńirde mádenı-tanymdyq týrızmdi damytý úshin múmkindik zor. Mysaly, teńizge shyǵa almaıtyn eń iri el retinde Qazaqstan úshin bizdiń aýmaǵymyzda jerdiń qurlyqtyq polıýsi ornalasqandyǵy mańyzdy. Abaı oblysy Jıdebaı shatqalyndaǵy Uly Abaı mýzeı-úıi janynda «Eýrazııa qurlyǵynyń ortalyǵy» eskertkish belgisi ornalasqan. Bizdiń halqymyz úshin bul qasıetti oryn jáne osyǵan uqsas geografııalyq qubylys tek ishki ǵana emes, sheteldik týrıster úshin de tartymdy bolatynyna senimdimin», - dedi Qasym-Jomart Toqaev.

Prezıdent Semeıdiń elimizdiń tarıhı ortalyqtarynyń biri retinde baı mádenı baılyǵymyzǵa uqypty qaraýdyń úlgisi bolýǵa tıistigin aıtty. Sonymen birge, oblys qurylǵan soń qalanyń belsendi damıtynyn atap ótti.

«Óńirdiń týrıstik áleýetin kúsheıtýdiń negizgi sharttarynyń biri – ınfraqurylymdy damytý. Eń aldymen, jol máselesin sheshý qajet. Týrısterdi tartatyn oryndarǵa kedergisiz jáne yńǵaıly jetýdi qamtamasyz etý kerek. Sondaı-aq, kommýnaldyq jelilermen baılanysty mádenı nysandar máselelerin sheshý qajet. Ertis ózeniniń jaǵalaýyn abattandyrýǵa erekshe nazar aýdarý kerek. Jańa mártebesin eskere otyryp, Semeı qalasyn damytýdyń Bas josparyn jańartý qajet», - dedi Prezıdent.