Semeı qalasyndaǵy startaptardy qoldaıtyn bıznes-ınkýbator jobasy naýryz aıynda bastalady

<p>SEMEI. KAZINFORM - Abaı oblysynyń óńirlik kommýnıkatsııalar qyzmeti alańynda &laquo;Semeı qalasynyń ishki saıasat bólimi&raquo; MM basshysy Nurjan Esenjolov &laquo;Semeı qalasyndaǵy startaptardy qoldaıtyn bıznes-ınkýbator jobasy&raquo; týraly aqparat berdi.</p>

Joba jas kásipkerlerdiń qyzmetiniń damýyna qolaıly jaǵdaı jasap, problemalardy birlesip sheshý, damytý jáne kásipker bolýǵa yntaly jastardy qoldaý maqsatynda qurylǵan.

Sonymen qatar, bólim basshysy memlekettik jastar saıasatynyń iske asyrylý barysy jaıly da atap ótti.

«Eńbek naryǵynda suranysqa ıe mamandyqtar boıynsha qysqa merzimdi kásiptik oqytýǵa dánekerleýshiler, tiginshiler, aspazdar, kran mashınısi jáne basqa da mamandyqtar boıynsha 22 adam jiberildi. 2023 jylǵy jeltoqsandaǵy jaǵdaı boıynsha NEET sanatynda 1 313 jas tirkeldi», - dedi Nurjan Esenjolov.

Bıznes-ınkýbator jobasyna 35 jasqa deıingi kez-kelgen jastardyń qatysýǵa múmkindigi bar. Eń bastysy jastardyń ıdeıasy jáne ony usynýy ekendigin jetkizdi qalalyq máslıhat depýtaty Madına Edilbekova.

«Bizde kóptegen kásipkerler men startaperler bar. Biraq olardyń kópshiligi, ásirese jastar, kimge júginý kerektigin jáne jospar qurýdy bilmeıdi. Aqparattyq tehnologııalar ǵasyrynda biz ýaqytpen birge júrýimiz kerek. Semeı ákiminiń qoldaýymen biz baǵdarlamany startaperlermen birlesip uıymdastyrdyq. Mysaly: kóptegen qyzdar úıde nan pisirýmen aınalysady, biraq ony bızneske qalaı aınaldyrýǵa bolatynyn bilmeıdi, kómek suraıtyn jerlerin de bilmeıdi. Mine, osy jastarǵa, ıaǵnı isin jańa bastaǵan kásipkerlerge kómektesemiz», - dep atap ótti Madına Edilbekova.

Sondaı-aq, depýtat qala ákimshiligi jastardy qarsy alýǵa jáne onymen jumysty barynsha tıimdi etýge daıyn ekenin aıtty.

«Biz jumys isteýge yntaly, óz isin damytýǵa, úlken paıda tabýǵa umtylatyn jastardy qoldaýǵa daıynbyz. Bul bizdiń jastarymyz úshin jaqsy bastama dep oılaımyn», - dep qorytyndylady Madına Edilbekova.