Semeı irgesindegi aýylda aýyz sý máselesi sheshiledi

SEMEI. QazAqparat - Semeıdiń mańyndaǵy Qaınar aýylynda  sheshilmegen áleýmettik máseleniń  biri  halyqty taza aýyz sýmen qamtý. Semeı qalasynyń ákimi Ermak Sálimov bul másele qys mezgili bastalǵanǵa  deıin sheshiletinin jetkizdi, dep habarlaıdy QazAqparat.

Qala ákimi Ermak Sálimov  Qaınar aýylyna  arnaıy jumys saparymen baryp,  eldi mekenniń  tynys-tirshiligimen tanysty. Aýyl ákiminiń halyq  aldyndaǵy   esebi  boıynsha  berilgen tapsyrmalardyń oryndalý barysyn  pysyqtady.

  Aýyldaǵy basty máseleniń biri  aýyz sýmen qamtý. 2017 jyly respýblıkalyq bıýdjetten  467 mıllıon  teńge bólinip,  sý tartý  jumystar bastalǵan. Búginde 194 mıllıon teńge ıgerilip,  aýyldyń ishine negizgi sý qubyrlary tartylǵan. Biraq merdiger mekeme óz jumysyn  durys  atqarmaǵandyqtan, kelisimshart toqtatylǵan. Qazir másele sotta qaralýda. 

«Sý qubyrlary qazir aýyl turǵyndarynyń  aýlasyna deıin tartyldy. Turǵyndar bolsa  ary  qaraı úıdiń  ishine ózderi tartý kerektigin bilmeıdi. Aýyl ákim halyqqa  atqarylyp jatqan jumystar týraly  túsindirip aıtpaǵan, halyqpen kezdespegen. Aldaǵy ýaqytta  biz barlyq jumystardy aıaqtaımyz, ol kezde kúz bolyp, jer qazý jumystary qıyndaıdy, sondyqtan qazirden  bastap  iske kirisý kerek. Turǵyndar sýdy qabyldap alý úshin daıyndyq jumystaryn jasaý kerek»,-dedi qala ákimi.

Aýyl turǵyndarynyń úılerin aralap, jaǵdaıdy túsindirip shyqqan qala ákimi negizgi qubyrlar tolyqtaı tartylǵandyǵyn, aldaǵy ýaqytta basqa merdiger kompanııa jumystardy  aıaqtap, qys bastalǵanǵa  deıin aýyz sý aýylǵa beriletinin jetkizdi.

«Úılerdiń irgesine kelgen  sýdy  turǵyndar óz qarajattaryna  ary qaraı qabyldap alady. Onyń  ózindik tártibi men talaptary bar. Biz barlyq turǵyndarǵa úı ishine tartatyn sý qubyrlarynyń  birińǵaı tıptik  jobasyn  jasap shyqtyq, onda bári naqty kórsetilgen. Sol  boıynsha  jumys isteý qajet»,- dedi «Semeı sý arnasy»  MKK dırektory  Erken Saǵyndyqov.