«Semeı-Astana» poıyzy jolaýshylaryna ótemaqy tólenedi

ASTANA. QazAqparat - «Jolaýshylar tasymaly» AQ basqa poıyzdyń jolaýshylary úshin vagondary aǵytylyp alynǵan «Semeı-Astana» poıyzynyń jolaýshylarynan keshirim suraıdy, dep habarlaıdy QazAqparat.

«Standarttan tys jaı oryn alyp, jolaýshylar tasymalyn qamtamasyz etý úshin shuǵyl sharalardy jedel qabyldaý qajettigi týyndady. Bul sapardyń klıentterimiz úshin qanshalyqty qıyn bolǵanyn ári olarda sapar sharshatqandyǵyn túsinemiz jáne shydamdylyq pen túsinistik tanytqandary úshin shynaıy rızashylyǵymyzdy bildiremiz. «Jolaýshylar tasymaly» AQ keltirilgen qolaısyzdyqtar úshin jolaýshylardan keshirim suraıdy jáne olarǵa sáıkesinshe ótemaqy tólenetindigin habarlaıdy», - dep atap ótedi kompanııa QazAqparattyń resmı saýalyna oraı.

Buǵan deıin habarlaǵanymyzdaı, 2018 jyldyń 4 qańtarynda «Astana-Lenınogorsk» baǵytynda qatynaıtyn №375 «Tulpar-Talgo» poıyzynyń tehnıkalyq vagonynan shyqqan aqaý saldarynan jolaýshylar vagondarynyń temperatýra rejiminiń tómendeýi oryn aldy.

Kompanııa málimetinshe, osydan keıin tasymal qaýipsizdigin qamtamasyz etý maqsatynda atalǵan poıyz Semeı stansasynda toqtatyldy. Al 228 jolaýshyny dittegen jerine jetkizý jáne keri 274 jolaýshyny alyp qaıtý úshin jeke poıyz uıymdastyrylyp, oǵan №153 "Semeı-Astana" poıyzynyń 7 standartty kýpe vagonyn tirkeý týraly sheshim qabyldanǵan.

«№153 «Semeı-Astana»  poıyzynyń 601 jolaýshysyn der ýaqytynda tasymaldaý jáne syıymdylyǵy nebary 150 adamdy quraıtyn Semeı vokzalyna qolaısyzdyqtar týdyrmaý maqsatynda (Pavlodar stansasynan jiberilgen vagondardy kútken jaǵdaıda poıyz 7 saǵatqa keshigetin edi) barlyq jolaýshylardy 7 platskart vagonmen Degeleń stansasyna deıin jóneltýge sheshim qabyldandy. Semeıden Degeleń stansasyna deıingi jolǵa ketetin ýaqyt 2 saǵat 40 mınýtty qurady», - dep atap ótedi kompanııa.

Taratylǵan málimetke sáıkes Pavlodardan jiberilgen 6 vagon Degeleń stansasynda «Semeı-Astana» poıyzyna tirkelip, oǵan jolaýshylar otyrǵyzylǵan.

«Fors-majorlyq jaǵdaıdy, mınýs 34 gradýsty quraǵan aýa raıyn eskere otyryp, jolaýshylardyń eshqaısysynyń zardap shekpeýi jáne dittegen jerlerine josparlanǵan ýaqytta jetýleri úshin barlyq múmkindikti sharalardy qabyldadyq», - dep sendiredi kompanııadan.

Esterińizge, sala ketsek, buǵan deıin basqa poıyz jolaýshylaryn tasymaldaý úshin vagondary aǵytylǵan «Semeı-Astana» poıyzynyń jolaýshylary tasymaldaýshymen sottasýǵa sheshim qabyldaǵandyǵyn jazǵan bolatynbyz.