Semeı ákimi áýejaı ǵımaratynyń jekege satylyp ketýine qatysty túsinik berdi

ASTANA. QazAqparat - Semeı áýejaıynyń jekemenshikke satylyp ketilýine baılanysty ondaǵy qaıta jańǵyrtý jumystary toqtatyldy. Mundaı tapsyrmany qalaǵa sapary barysynda Shyǵys Qazaqstan oblysynyń ákimi Danıal Ahmetov berdi, dep habarlaıdy QazAqparat altaynews.kz saıtyna silteme jasap.

7 aqpan kúni halyqpen eseptik kezdesýi barysynda Semeı qalasynyń  ákimi Ermak Salımov áýejaı ǵımaraty aınalasyndaǵy daý-damaıdy túsindirip, strategııalyq nysannyń jekege ótýine kimniń kináli ekendigin aıtyp berdi.

 «Semeıde «Semeıavıa» fırmasy jumys istegen. Oǵan bir kezderi áýejaıdyń ǵımaraty da tıesili boldy. Qazir bul kompanııa bankrottyq protsedýralarynan ótip jatyr. Munymen bankrottyq basqarýshy aınalysýda. «Semeıavıanyń» balansynda bolǵan jekelegen nysandar - ushyp-qoný jolaǵy jáne áýejaı ǵımaraty jańǵyrtý jobasyna engen edi. Bankrottyq basqarýshymen áý-basta kelisim boldy. Ol saýdany jarııalap, áýejaı múlkin memleket menshigine, ıaǵnı «Ertis» áleýmettik kásipkerlik korporatsııasynyń balansyna beretini aıtyldy. Bıýdjette atalmysh nysandarǵa quıylýy tıis qarajattar da qarastyrylǵan bolatyn. Saýda ótti, biraq bankrottyq basqarýshy múlikti múldem ózge tulǵalarǵa satyp jiberdi. Memleketke emes, áldebir JShS-ǵa», - dedi Semeı ákimi.

Atap ótilgendeı, búgingi kúni áýejaı ǵımaratyn memleket ıeligine qaıtarý boıynsha tıisti sot protsedýralary júrip jatyr.

«Sebebi, áýejaı - strategııalyq nysan. Nysannyń ıeleri óz sharttaryn qoıatyn jaǵdaılar da týyndaýy múmkin. Mysalǵa, jolaýshylar tasymaly boıynsha. Mundaıǵa jol berilmeýi tıis. Sol sebepti, atalmysh kelisimdi zańsyz dep taný týraly sotqa aryz-shaǵym túsirildi. Áýejaı ǵımaraty memleket menshigine qaıtarylatyn bolady», - dep habarlady Ermak Salımov.