Seleznev atyndaǵy horeografııalyq ýchılışege jóndeý jumystary júrgiziledi

ALMATY. QazAqparat- Almaty qalasynyń ákimdigi A. Seleznev atyndaǵy horeografııalyq ýchılışege jóndeý jumystaryn júrgizedi. Bul týraly Almaly aýdany turǵyndarymen kezdesý barysynda Erbolat Dosaev málim etti, dep habarlaıdy QazAqparat tilshisi.

Qala basshysymen kezdesýge arnaıy kelgen Almaty turǵyny horeografııalyq ýchılışege qatysty máseleni kóterdi.

«Birinshiden, osydan bes jyl buryn Seleznev atyndaǵy Almaty horeografııalyq ýchılışesinde jataqhana qurylysy bastalǵan bolatyn. Osy ýaqytqa deıin qurylys aıaqtalmaı tur. Ekinshiden, jataqhanada oryn tapshy»,- dedi turǵyn.

Erbolat Dosaevtyń aıtýynsha, Seleznev atyndaǵy ýchılışe – respýblıkalyq mektep. «Mádenıet mınıstrligimen birlese otyryp, mynadaı sheshim qabyldadyq. Mádenıet mınıstrligi qurylysy aıaqtalmaǵan jataqhanany buzýdy qamtamasyz etedi, óıtkeni ony paıdalanýǵa berýge bolmaıdy. Buzý jumystary 2023 jyly júrgiziledi. Al, ýchılışe ǵımaratyn qala óz balansyna alyp, jóndeımiz. Sondyqtan bul máseleni jartylaı sheshe alamyz dep oılaımyn. Jataqhanaǵa kelsek, ony mınıstrlik ózi sheshýi kerek»,-dedi qala ákimi

Aıta ketpeıik, jetekshi oqý ornynyń ashylǵanyna 90 jylǵa jýyqtady. Ýchılışe túlekteri álemniń ár elinde óner kórsetip, balet ónerin damytyp keledi. Bul ujym túlekteri Qazaqstan baletiniń negizin qalaǵan.