Selektsııa jáne tuqym sharýashylyǵy salasyn damytý jospary ázirlenýde
«Oblys ákimdikteriniń derekterine sáıkes sýdy kóp qajet etetin aýyl sharýashylyǵy daqyldarynyń (kúrish, maqta) sanyn qysqartý boıynsha qabyldanyp jatqan sharalardy eskere otyryp, 2023 jylǵa arnalǵan egis alańdarynyń boljamdy qurylymy qalyptastyryldy. Máselen, jalpy egis alańy 23 mln gektardan asady, onda tuqym sebý josparǵa sáıkes júrgiziledi. Tuqym sharýashylyǵynyń attestattalǵan 16 sýbektisi aýyl sharýashylyǵy taýarlaryn óndirýshilerdi sapaly maqta tuqymymen qamtamasyz etedi. Onyń ishinde: 1 orıgınator, 2 elıtalyq tuqym sharýashylyǵy, 10 birinshi, ekinshi jáne úshinshi reprodýktsııaly tuqym óndirýshiler. Qazaqstan Respýblıkasynda paıdalanýǵa usynylatyn Selektsııalyq jetistikterdiń memlekettik tizilimine maqtanyń 16 sorty engizildi. Onyń ishinde: 12 otandyq, 3 sheteldik, 1 birlesken selektsııa», - dep atap ótedi Álıhan Smaıylov jaýabynda.
Úkimet basshysynyń atap ótýinshe, qazirgi ýaqytta tájirıbelik sharýashylyqtar bazasynda bastapqy tuqym sharýashylyǵyn damytý, onyń ishinde jabdyqty jańartý jáne agrarlyq ǵylymdy yntalandyrý jónindegi tapsyrmany oryndaý úshin Selektsııa jáne tuqym sharýashylyǵy salasyn damytý jónindegi keshendi jospar ázirlenýde. Keshendi jospar Qazaqstannyń selektsııasy men tuqym sharýashylyǵynyń barlyq kezeńderinde oryn alatyn júıeli máselelerdi sheshýge baǵyttalǵan is-sharalardy engizýdi kózdeıdi.
«Selektsııalyq mekemelerdi, tájirıbelik sharýashylyqtar men tuqym óndirýshilerdi tehnıkalyq qaıta jaraqtandyrýǵa jáne óndiris quraldarymen qamtamasyz etýge yqpal etetin is-sharalarǵa erekshe nazar aýdaryldy. Bıylǵa oblystardyń jergilikti bıýdjetterinde tuqym sharýashylyǵyn damytýdy sýbsıdııalaýǵa 11 mlrd teńgeden astam qarajat kózdelgen. Tyńaıtqyshtarǵa qajettilik 703 myń tonnany quraıdy. Bul ótken jylmen salystyrǵanda 58 myń tonnaǵa artyq. Osy kólemniń shamamen 442 myń tonnasy óndirisin otandyq zaýyttar júzege asyratyn tyńaıtqyshtardyń 2 negizgi túrine (ammıak selıtrasy jáne ammofos) tıesili. Sondyqtan dıqandardy otandyq tyńaıtqyshtarmen ýaqtyly qamtamasyz etý úshin atalǵan qajettilik óndirýshilerge naqty jetkizý kestelerin qalyptastyrý úshin jiberildi jáne dıqandardyń ótinimderine sáıkes óńirlerdi tyńaıtqyshtarmen tolyq qamtamasyz etý týraly ýaǵdalastyqqa qol jetkizildi», - dedi Premer-Mınıstr.