Sel men topyraq kóshkini qaýpi qaı óńirlerde joǵary – mınıstrlik málimeti

ASTANA. QazAqparat – Sońǵy bes jylda sel men qar kóshkini júrý qaýpi joǵary ýchaskelerdiń kóbeıýine baılanysty profılaktıkalyq is-sharalar kúsheıtildi. Bul týraly «Ashyq» NQA portalynda jarııalanǵan Tótenshe jaǵdaılar mınıstriniń qaýlysynda jazylǵan, dep habarlaıdy QazAqparat tilshisi.

«Sońǵy bes jylda sel qaýpi bar ýchaskeler sanynyń 584-ten 609-ǵa deıin, topyraq kóshkini qaýpi bar ýchaskeler 168-den 394-ke deıin, qar kóshkini qaýpi bar ýchaskeler 542-den 610-ǵa deıin, morenalyq kólder sany 694-ten 970-ke deıin artýyna baılanysty qaýipti morenalyq kólderdi bosatý, qar kóshkinderiniń profılaktıkalyq túsýleri jónindegi is-sharalardy júrgizý kúsheıtilip jatyr.

Osy is-sharalar oryndalmaǵan jaǵdaıda óńirlik jáne jahandyq aýqymdaǵy tótenshe jaǵdaılar bolýy múmkin, olar órt, avarııa jáne ózge de qaýipti qubylystar men protsesterdi týdyrýy yqtımal. Sondaı-aq 50 myńnan astam adamnyń qaza bolýyna, halyqtyń ómir súrý jaǵdaıynyń buzylýyna ákep soǵýy múmkin. Bul tek Almaty qalasy boıynsha ǵana mysal.

Osyndaı tótenshe jaǵdaılar Shyǵys Qazaqstan, Jambyl, Jetisý jáne Túrkistan oblystarynda da oryn alýy yqtımal», - delingen qujatta.

Qosa keteıik, bıyldan bastap densaýlyǵy men ómirine qaýip tónetin jumysty atqaratyn qutqarýshylarǵa qosymsha aqy tólenbek.