Segiz aıda Qazaqstan ekonomıkasy 4,8 paıyzǵa ósti

ASTANA. QazAqparat – Bıylǵy 8 aıda el ekonomıkasy 4,8 paıyzǵa ósti. Bul týraly búgin Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Osy jyldyń qańtar-shilde aılarynyń qorytyndysy boıynsha Qazaqstan ekonomıkasynyń ósý qarqyny 4,8 paıyzdy qurady. Onyń ishinde naqty sektor – 4,6, al qyzmet kórsetý salasy 4,7 paıyzǵa ósti. Negizgi salalardyń barlyǵynda oń dınamıka baıqalýda, ásirese qurylys, saýda, sondaı-aq aqparat jáne baılanys eń joǵary ósimdi kórsetti», - dedi mınıstr.

Onyń dereginshe, negizgi kapıtalǵa salynǵan ınvestıtsııalardyń ósim qarqyny 12,4 paıyzdy qurady.

«Investıtsııalar aǵyny kólik jáne qoımalaýda – 57,7, bilim berýde – 24,3, saýdada – 22,6, aýyl sharýashylyǵynda – 21,3, sondaı-aq ónerkásipte – 9, onyń ishinde taý-ken óndirý ónerkásibinde 8,4 paıyzǵa artty.

Óńirler arasynda eń joǵarǵy kórsetkish Abaı, Mańǵystaý, Batys Qazaqstan jáne Pavlodar oblystarynda baıqaldy», - dedi Álibek Qýantyrov.

Mınıstrdiń atap ótýinshe, aldyn ala qorytyndy boıynsha 2023 jylǵy qańtar-maýsymda syrtqy saýda taýar aınalymy 4,3 paıyzǵa ósip, 67,2 mlrd dollar boldy.

«Eksport 38 mlrd dollardy qurady. Bul rette óńdelgen taýarlar eksporty 12,1 mlrd dollarǵa jetti. Taýarlar ımporty 29,3 mlrd dollardy qurady. Jalpy, oń saýda balansy 8,7 mlrd dollarǵa teń», - dedi ol.